La polpetta del Re/Quader X
 |
Questo testo è stato riletto e controllato. | |
| ◄ | Quader IX | Quader XI | ► |
QUADER X.
El Delitt.
El dì l’è minga nancamò spontáa
quand se dessèda Sua Maëstáa.
— «E... inscì?» la ghe domanda la Regina.
— «Me par de stà on poo mèj in stamattina!»
— «Va là... torna a dormì
che l’è minga anmò dì!»
El Re el se volta; el se quietta;
e, tirand on sospir, el dis: «Polpetta!»
Però, ai vott or, el torna a dessedass.
— «Ohe... come vala?» — «Me par de rinass!
Stoo propri mèj!» — «Ben, dorma on’altra oretta!»
E el Re el cambia de fianch disend: «Polpetta!»
El derv i oeucc de capp vers i noeuv or.
— «Voj, Regina, l’è tard!» — «Lassom quietta,
che alla mattina el sogn el var tant or!»
E el Re el se volta, e el torna a dì: «Polpetta!»
Ma, vers i des, tirandes in setton,
Söa Maëstáa la scolta pù reson
e la sbraggia: «Ghoo famm! Ah, marcadetta,
sono o non sono il Re?...
Olà!... Recate a me
la mia regal polpetta!»
Tutta la Cort, che la stava a speccià
sto gran moment dedrée de l’antiport,
’penna la sent el Re sbraggià inscì fort,
la se mett anca lee a sbragalà:
«Polpa, polpéra, polpée sta polpetta!
Polpée polpetta, che el gran Re le spetta!»
Allora, dài, din-din,
ghè tucc i campanei in moviment;
chi va, chi ven, chi sbuttonna el visin,
chi salta, chi va foeura e chi va dent...
Ma la polpetta, intant, la riva no!
Sicchè el Re, bestemmiand, pien de dispett,
el salta giò del lett...
La gà bell pari a tegnill la Regina;...
lù, in camisa, el va drizz vers la cusina!
L’era già a mezza scala;
già el Capp-Coeugh, vestii in gala,
sora on gran piatt d’or fin,
el ghe sporgeva al Re la soa polpetta;
quand, come ona saetta,
tracch, se ved el Scianin
saltà sul piatt, ranfà el boccon regal,
e poeu sparì come el gavèss i al!
Ah, Signor!... Che terror!
Che moment che l’è stáa!
A dusent Damm d’onor
tutt a on tratt ghe ven máa!
El Capp-Coeugh, vestii in gala,
a on assalt tant birbon,
el va giò de la scala
come el fuss on ballon!
Quei de sott vosen: «Ahi!»
perchè el gà schisciáa i cai;
per el gran fora-fora,
vosen: «Ohi» quij dessora;
Re e Regina, svegnuu,
vosen: «Ih!» tutt e duu!
L’è on concert de lament...
Nissun sa cossa fà...
Domà vun, finalment,
el se mett a sbraggià:
«Alto là! Nient paura!
«Cossa forcom?... Semm matt?...
«Chì ghe voeur la Questura!...
«Che se arresta sto gatt!»
