La polpetta del Re/Quader XI
 |
Questo testo è stato riletto e controllato. | |
| ◄ | Quader X | Quader XII | ► |
QUADER XI.
La Corte d’Assise.
El poer Scianin l’hin reussii a ciappà,
e ghe faran adess, — el sò process!
Quanti besti che el deven giudicà!
Leopard e Volp, e Tigher e Pantér,
e Lóff, e Can boldocch, e Ors bianch e ner,
Scimbi, Jènn e Serpent,
e, insomma, tutti i besti, che hin pussée
malign e violent!...
Dedrée a sti besti riva poeu el vespée
di testimoni contra al poer Scianin:
Màgol e Coeugh e finna anca la Strìa...
E la gran cattabréga la se invia
al Palazz de giustizia lì visin.
— «Entra la Corte!» — «Come vi chiamate?»
— «Scianin.» — «El vostro padre?» — «Mi soo no!»
— «Fee minga el martor, neh, el mè gatt!... Guardate
che denter chì scherzare non si puo!
Vostra madre?...» — «La Scianna.» — «Scianna chìi?»
— «Quella de san Caloss!» — «Che etáa gavìi?»
— «Soo no!»
Ma a stoo «Soo no» el Gran Can de Dia,
settáa al so post de Inquisitor Fiscal,
el dà foeura a sbottì come on’arpia
in nomm de la giustizia e la moral:
— «Com’è?!... Di besti gross e rispettáa,
come hin quij de l’eccelso tribunal,
se faran mincionà de sto animal,
che l’ha robáa,... non solo,... ma robáa
nientemen che al Re-Ciappachelghè?!
L’è vora di fornirla!... Se lui stesso
l’è giamò reo confesso,
l’è inutil de discutt sora el misfatto...
che el vaga sulla forca questo gatto!»
Alla parola forca el poer Scianin
el gà avuu on sgrisol finna in del covin;
ma poeu, come succed ai disperáa,
l’è andáa foeura di strasc e l’ha mognáa:
— «Ah sì! Alla forca mi!?
Ben,... ghe andaroo! Ma, prima, vuj parlà!»
— «Silenzio!» — «No... vuj dì
che sont minga mi sol quanto al robà!
E che, se al Re mi ghoo robáa on boccon,
ghè de quij che ghe roben di milion!»
— «Basta!... Silenzio!... A mort!...
«Sulla forca!» se mètten a sbraggià
tutti i giudes in coro coi facc smort.
El voeur trass giò la gola el Can de Dia;
e, in mezz ai testimoni,
el Coeugh, el Màgol e la vèggia Strìa,
sbraggen pussée de tucc come demoni!
Mago, magasc,
che te poda s’cioppà el petasc!
Ti, vèggia Strìa,
che te staghet cent’ann in agonia!
Ti, Can de Dia,
che el nas el te borla via!
E ti, porco Coeugh,
che te podet borlà in del foeugh!
Denanz a quella scenna, el poer Scianin
el va in deliqui per el gran magon;
e allora duu mastin
el porten via de pes anmò in preson.