La polpetta del Re/Quader IX
 |
Questo testo è stato riletto e controllato. | |
| ◄ | Quader VIII | Quader X | ► |
QUADER IX.
Quell che se ved e quell che no se ved.
Tutta nott, — sora e sott,
la cusina, a foeugh e fiamm,
la someja a on fornason!
Tra la legna e tra el carbon
a centenn de chilogramm,
tra dottor e barberon,
boeu, vitell, etzeterà,
chissà quanti palancon
che l’Erari el dev pagà!
Oh, per quest, l’Erari el paga!
Ma el miracol, el portent,
l’è che, al solit, lù i e paga...
ma i e paga per nïent!
Per nïent?...
Ma com’è?
Stemm attent,
fée piasè!
Bastarà
dò paroll
a spiega
sto viamoll!
El Mago el s’è accordáa
col Capp-Coeugh; e el Capp-Coeugh (no se discor!)
el s’è accordáa anca lù coi fornitor!
La legna, che va in fiamm, l’è tutta... paja!
El carbon... foffa d’ogni qualitáa!
E boeu, vitell, porscell, e tord, e quaja,
e, insomma, tutt el recipe ordináa,
se ridussen a on sacch de pell, sgonfiáa
e miss a buj in d’ona gran caldera,
dove, invece de mettegh del barbera,
gh’è staa vojaa tutt la pesg ciorlina
che i ost quell’ann gh’aveven in cantina...
Sicchè, dei palancon
che Pantalon — poeu el dovarà pagà,
hin stáa spenduu domà — pocch palanchett
per comprà voeunna de quij tai polpett,
che el nost Ceser Consonn
al so Orologg el fabbrica inscì bonn!
Settáa giò denanz al foeugh,
rid el Màgol, rid el Coeugh
per la bella invenzïon
che ghe frutta i palancon.
lnvoltada in d’on palpée,
e sarada in d’on vestée,
la polpetta l’è già lì
a speccià de comparì
al cospett de Soa Maestáa
al moment predestináa.
Rid el Màgol, rid el Coeugh,
settáa giò denanz al foeugh;
e, lor sì, beven de bon
on magnifich bottelion
de barbera straveggion;
de quel tal, che, quand el Re
el domanda se ghe n’è,
disen semper: «Caro lù,
Ne dispias... ma ghe n’è pù!»
Intant, sconduu de sott d’on tavolon,
el Scianin, che l’ha vist e el sà tusscoss,
el dis in del sò coeur: «Che mond birbon!
Che masnada de lader e baloss!...»
Ma, cont sti filosofich riflession,
ghe resta anmò semper la famm indoss;
sicchè el conclud che, in fin di fatti, quell
che adess a lù ghe premm, l’è trà in castell!
El sogn de prima; dopo, quij piattitt
che el Màgol l’ha ditt sù; poeu el ricetton,
ghan guzzáa in tal manera l’apetitt
che el Scianin l’ha perduu fin la reson...
Senza accorges lù el medita on delitt
pur de finilla cont la borlazion!...
On delitt?... Nientemen?... Che delitt l’è?...
Quell de paccià la polpetta del Re!...