Rime milanesi (Pertusati)/Meneghin a Padova.
 |
Questo testo è incompleto. | |
Meneghin a Padova.
Meneghin sott ai Todisch?
L’hoo promiss, e me credeva
3A despecc di mee guarisch
De cantall; ma no saveva
Che a tornà in di noster part
6El mirass el Bonapart.
Tredes mes l’Imperator
L’ha tegnuu la Lombardia,
9E in sto temp col sò valor
Melàs sol l’ha boffaa via,
Come fussen de tarocch,
12Oltertant Fortezz e Rocch.
Oh! i bej dì ch’hin mai staa quij
Per i pover Buseccon!
15Ma hin sgoraa comè i usij,
Chè pur tropp in sul pù bon
Dalla part del Novares
18Vens giò on morbo de Franzes.
La sarà ona scorraria
Se diseva in da per tutt,
E in pocch di tornaran via,
Chè no l’è minga inscì brutt
El ciappin comè i pittor
El depensgen coi color.
La sarà quell che vorrii
Ma intrattant lor hin vegnuu,
E nun lôcch, nun sbaguttii
Pu che in pressa emm tolt el duu,
E s’è vist su parecc straa
Centenara de emigraa.
Chi và a Lod, chi và a Cremona
Chi và a Mantova a toù post:
La pù part van’a Verona:
E oh! che calca in cà di ost!
Mi sont staa su on’ostaria
Dove el barba l’è on’arpia.
El pesg l’è per mia deslippa
Che gh’aveva pocch pescuzzi,
E trattandes de la trippa,
Ghe vœur olter che menuzzi:
Sont in ball: s’ha de ballà:
E on quaj sant m’ajutarà.
Da Verona in manch d’on di
Sont andaa a dormì a Vissenza
Pœù andè a Padova, e poss di
Sont chilò de ressidenza;
E pur tropp l’è già trii mes
Che me trouvi chì in sui spes.
Via ch’ess staa de sfugatton
A Venezia dò voult sol
Per ciappà da on pantalon
Di dance, ch’hoo tolt su a nol;
E el fudè, bougna ch’el diga,
Galantomm de prima riga.
L’è trii mes, chi el credarà!
Che no mangi pù busecca
Che sont tant lontan de cà,
Chę me par d’ess a la Mecca;
E in sto temp, oh Meneghin,
Te see semper staa su i spin!
Hoo ben vist per quaj moment
L’arch in ciel, quand el tronava,
E specciandem el bon vent,
Tananan! mi gibilava,
Ee staa quand i tempest
N’han servii col vaga el rest.
Che bej nouv no se scriveva
Giuradina sui primm dì?
Tolta Genova el pareva
Che dovessen fà bott lì
El Prim Consel ei Monsù,
O restà cont él cuu in sù.
Ma sciur nò che s’han de batt
I Todisch cont i Franzes,
Ei gazzett ne denn i fatt
Di primm di ciar e destes
E per gloria di Barbis
Con la pesg di nost nemis.
Confessemm la veritaa:?
Gh’è mò staa tra nun paricc
Che al senti sti novitaa,
A la foeuggia di nost vicc,
L’abbia ditt: Ah! ve ringrazi,
Car Signor, de tanti grazi!
Chi saltava d’allegria,
Chi pensava a fà fagott:
Biccieritt, bottegliaria...
Quand, ohimè! che tutt a on bott
Mudaa scenna, hin scià i notizi
Del terribel armestizi,
Nizza, Genova, Turin,
Zittadella de Tortona,
E Lissandria, e Cuni, infin
El Piemont, Milan, Cremona,
Crema, Bressa, oh che spavent!
Se zed tutt in d’on moment.
Asca Mantova e Ferrara,
I fortezz de prima sfera
Bonapart el si a incappara,
E el ne mett al sicut éra,
E a sti patt, giura Taddee!
E a sto segn semm tornaa indree?
Quest l’è el frut de tanc sudor
De miara de soldaa?
Quest l’è el premi del valor
De tanci omen sotterraa,
Ch’hin staa a botta de cannon
Sott ai torr e ai torrion?
Ma che serv de s’cervellass
Per savè el perchè di coss
Che suzzed dai copp abbass?
Oh superbia de quattr’oss
De vorrenn savè de pu,
Stoo per di, de quell Lassù!
El Signor l’è lù el Resgiô
Per fa quell che pù ghe par:
Lù el dà luma i Stell e al Sô,
Lù el scadenna i vent sul mar;
Lù nol ten consej, de guerra,
E el comanda in ciel e in terra.
On cavell, che l’è on cavell,
Ona frasca, ch’è ona frasca,
Da la cassa del cervell,
Da la pianta mai no casca,
Se no gh’è on decrett prezis
Sottoscritt in paradis.
Tanto basta a Meneghin
Per tegnì la berta in sen;
Anch redutt in sanquintin,
Ciapparoo quell che ven ven.
Vù sii Quell che ne vivifega,
Vù sii Quell che ne mortifega.
Meditand sui nost castigh
Hoo resolt de fà giudizi
E a scansà priguel e brigh,
Paghè l’ost, e in d’on ospizi
D’on bon omm me retire,
Dove spendi pocch de chè.
Me sont miss in la contrada
Che la porta el nom del Sant:
L’è ona cà ben sitivada;
Gh’è de l’aria o tant o quant,
E per spass, quand voo a dormi,
Gh’è senza che fa immatti.
Chì, per dilla, foo ona vita
Che no l’è minga cattiva:
Se stoo sol comè on romita,
A nessun secchi la piva.
Leggi, scrivi, ma soo andà
Cont i amis fœura de cà.
Sema in quatter, sèma in ses,
Come porta l’occasion,
Se va intorna per i Ges,
Se fa on gir sui bastion
Fin a l’ora di tegnœur;
Poeù ognidun fa quell che voeur.
Ma el mè strasc de calisson,
Ch’el domanda on ciod al mur,
Chì el me rend tropp cattiv son:
Ah! el destacch l’è staa ben dur!
Per podè cantali in vers
Milanes! che amis emm pers!
Cavanagh... El sò nom basta
Per formagh la soa inscrizion:
Che bell cœur! che bona pasta!
Che modell de perfezion!
E la mort su on’ostaria
La ne l’ha de ranzà via. 1
Brutta mort! Ma sont pur matt
A scoldamm contra costee,
Se l’usà sti fatt de fatt
L’è on dover del sò mestee:
L’è el Signor ch’ha volsuu înscì,
E nun l’emm de benedì.
Su la mort de sto brav scior
Hoo miss giò duu sonettitt 2(2)
Per da sfogh al mè dolor,
Che anch che varen pocch sesitt
Fan vedè che al qualis vita
Correspond el finis ita.
Dopo on colp inscì improvvis
Che el n’ha faa restà de sass,
I gaslitt di nostamis
Comenzenn a sparpajass:
Chi a Venezia, chi a Bassan;
Quajgherun tornè a Milan.
Mi mò in scambi saldo al post
Sospirand el mè rescatt,
Hoo ris’ciaa de cœus a rost
In sta cà... ma transiatt:
Perchè infin poeù el pes’g di maa
L’era quel di novitaa.
Sema i letter de Milan
( Ghe n’avevi anch de cà mia )
M’han faa stà cont el coo in man
Prevedend la calestria,
Che pur tropp cont i angarij
Ne regala i car fradij;
Sèma i lapp di gazzettista,
E tanc stamp ver o bosard
Indicciand, mettend in vista
Tucci priguer di Lombard,
M’han strengiuu su el cœur, ohimè!
E hoo tremaa de cap a pè.
Gh’avaremm anmò la guerra?
O avaran conclus la pas?
Oh penser che me trà a terra!
Oh incertezza!... Musa, tas.
E violter... Ah! sbraggee,
Meneghitt: Misereree!