Nizza, Genova, Turin,
Zittadella de Tortona,
E Lissandria, e Cuni, infin
El Piemont, Milan, Cremona,
Crema, Bressa, oh che spavent!
Se zed tutt in d’on moment.
Asca Mantova e Ferrara,
I fortezz de prima sfera
Bonapart el si a incappara,
E el ne mett al sicut éra,
E a sti patt, giura Taddee!
E a sto segn semm tornaa indree?
Quest l’è el frut de tanc sudor
De miara de soldaa?
Quest l’è el premi del valor
De tanci omen sotterraa,
Ch’hin staa a botta de cannon
Sott ai torr e ai torrion?
Ma che serv de s’cervellass
Per savè el perchè di coss
Che suzzed dai copp abbass?
Oh superbia de quattr’oss
De vorrenn savè de pu,
Stoo per di, de quell Lassù!
