Mi mò in scambi saldo al post
Sospirand el mè rescatt,
Hoo ris’ciaa de cœus a rost
In sta cà... ma transiatt:
Perchè infin poeù el pes’g di maa
L’era quel di novitaa.
Sema i letter de Milan
( Ghe n’avevi anch de cà mia )
M’han faa stà cont el coo in man
Prevedend la calestria,
Che pur tropp cont i angarij
Ne regala i car fradij;
Sèma i lapp di gazzettista,
E tanc stamp ver o bosard
Indicciand, mettend in vista
Tucci priguer di Lombard,
M’han strengiuu su el cœur, ohimè!
E hoo tremaa de cap a pè.
Gh’avaremm anmò la guerra?
O avaran conclus la pas?
Oh penser che me trà a terra!
Oh incertezza!... Musa, tas.
E violter... Ah! sbraggee,
Meneghitt: Misereree!
