Prose e poesie bellunesi 2010/22
 |
Questo testo è incompleto. | |
| ◄ | 21 | 23 | ► |
GIOVANNI BATTISTA DA RIN PAGNETTO (TITA DE INA, 1930)
Al mè paese.
Che bel che èra al mè paese cuanche l èra pi puareto! Cuanche le femene avea ncora le carpete, i omis no se fasea la permanente e i tosate se contentaa de doe stracaganasse. Che bel che èra!
Me piase pensà co deo col pare a menà co la lioda le taie là da la siega, a seà e fei sandole da bete sul cuerto. Èra n carel che dea avanti sui rule de len co su una taia, e là na siega che dea su e do svelta svelta, e seaa fora la brea. Al segat, senpre co la bareta de lana, al spostaa coi coi e le leve la taia, e subito al carel tornaa ndrio pronto a seà n autra brea. Èra fredo, ma staseone là a vardà.
Me piase anche pensà co porteone al sorgo a masenà là dal molin. La mare vignea col darlin e ió co la careola. N on gran, Vitorio, tolea su i sache de sorgo come che i fosse piuma, al dea su par na sala de len erta, dopo n tin al molin scominziaa a girà co n gran rumor e là do vignea fora, ca la farina e de là la senbola. Par aria èra duto n polvar bianco e deone fora anche noi bianche ma contente, co la nostra farina. E no puoi desmenteame co l nono me mandaa ia dal fauro, che al bete le lame sote la lioda nuova. Là inte èra duto negro de fumo e sto on, anche lui gran e co sto ciapel negro, co la tenaia al tiraa fora da la forgia sti fer ros che al batea, al giraa, al piegaa co ntorno duto na sintila. Me par de sintì ncora al martel sul incudin: tin - tin - tin - tinininnn...
E me penso co deo a tole le scarpe, che la mare avea portou a giustà là dal scarper. L èra sto on sentou sun scai con sora i denoi na falda blu, che co na sgubia al sbusaa al corame, al passaa i doi file e pò al tiraa e subito l tornaa a sbusà. “Son vignesto a tole le scarpe”, e lui al disea “Sì fiol”. E là n medo a dute ste scarpe al tolea su propio le mee.
Come se fà a no pensasse de chi marengoi che d inverno i stasea là tel fredo a feine le liodete? No i parlaa tanto, ma èra le so man che disea duto, chele man scure de laoro, piene de crepadure, coi dede storte da l artrite. Chele èra man de artisti, basta solo vardà le seradure dei portoi de n ota, i corlete che forse é ncora par le sofite, le cucete de cucera laurade a intarsio, duto fato a man e co puòche arnesi. Avon perso chel patrimonio de braura artigiana n canbio de una scatola de botoi che ne fà sentì inportanti: basta fracà un boton e se vèrde la porta, basta fracà e se sera al portel, basta. basta. e ncuoi nessun se spiega al parchè.
Penso che me avarae piasesto avé chele man scure, piene de cai.
Ades i omis à le man come le femene, lisse, bianche come le candele, zenza un stris, zenza na bota, man da botoi. Me vardo le mee e me vargogno, man morte, bone a fei nuia, e parchè no le feze bruta figura le tieno sempre te fonda, fracade do. Calche ota tiro fora una, cuanche nissun me vede, me neto ia la goza dal nas e subito la beto a sconde.
(Laio)