Prose e poesie bellunesi 2010/21
 |
Questo testo è incompleto. | |
| ◄ | 20 | 22 | ► |
ATTILIO CAFFARO (TILIO BIA)
Marieta e la gorna.
An dì me mare me ciama: “Và a aiutà Tita ia inte strada, che al é straco, poro vecio.” Al strozaa do an pezedat poco pi gros del tubo de la fornela.
“Tita, seo andà distante a tolo?” Visto che passaa dente, el dis: “Son andà su in zima, che ei un colonel del nono (*)1” E al me avea fato zignot. “Fiol, ancuoi polso, son straco; doman te insegno a fà na gorna.”
Al dì dopo, dopo meodì, al me avea ciamà e ei coresto ia. L avea ingrapà el pezedat con doi toc su alto da tera; mi i avee menà la mola, lui el se avea guà el manarin da scuarà e la sapa; aveo fato doi oci come panet a vede come al tiraa ia al filo morto co la piera a oio. Ei pensà: - laoro rognos.-
El se avea sbucià su le man, e l avea tacà, al manarinaa e al parlàa: “Te racomando, a scuarà e scavà se scomenza da la testa verso la zima.” E duto conzà con ostie e sacramenti.
L avea tirà na facia dreta che meio no l podea; aveon metù chela scuarada de sora e l avea scominzià a scavà. “Te digo, stà atento che la sapa no te perdona; la te vèrde an denoio.” Dopo l avea ciapà an sgrossin col fer tondo e tirà via le s-ciopadure.
Eraon dudi sul cuerto e calà do le corde: “Marieta! Fà un laz a fabrica.”**2
Pora femena, meda spasemada a vedeme in zima al cuerto, l avea fato doi grop.
L aveon tirada su, e aveon poià sta gorna inte i ganci; el se avea betù a tirà sarache che no aveo mai senti, pedo de un fariseo; pò el m à vardà con sinpatia: “Girete!”
Ei sentù na manada su la schena; l avea ciapà camisa, maia, braghe, mudande e al me avea cenù con la testa in do, a sgropà le corde. Da partèra ienia su le pedo insolenze che se pol pensà: “Poro gramo, inbezil, insemenì; te l cope! Scemo de guera!” E dal cuerto fulmini e tenpestade: “Tasi; insulsa, befana, redosola, perpetua, insemenida. Se te fosse ca te butarae do de sote!”
Mi avei pensà col cuor che me batea inte le rece: - Tasi Marieta! Se no el me mola!-
In duti i casi, sean tornadi do contenti; Tita el se avea magnà an pachet de trinciato, e a forza de sbucià, l avea fato le stèle color cafelate: na puza da bagol che me tolea el fià, ma ero contento che aveo inparà a fà na gorna, e anca an fraco de sarache.
(Nebiù)