Poesie (Porta)/159 - Despoeù che tanc poetta han scritt in rima
 |
Questo testo è completo. | |
Carlo Porta - Poesie (XIX secolo)
159 - Despoeù che tanc poetta han scritt in rima
| ◄ | 158 - Chi m'ha in del venter stravoltaa i buvij? | 160 - Hin chì dent quij taj tarocch | ► |
Despoeù che tanc poetta han scritt in rima,
Ezzelenza, tanc lod de lu e la sposa,
a fà l’ecco a tutt quell che han ditt lor prima
la me par la pù curta e manch ris’ciosa.
Inscì, senza inrabbimm né perd la scrima5
con la Musa poltronna e capriziosa,
ghe presenti on tributt della mia stima
in manera fors anch pù dignitosa.
Ezzelenza, pertant via che l’azzetta
insemma al mè coeur s’cett ambrosian10
el riepilogh di sforz di olter poetta
col cred che el mej elocc di sò vertù
l’è propri quell de vesses daa de man
a piasess tucc e duu, la sposa e lu.