Hin chì dent quij taj tarocch
per i noster senator,
mì i refili a lu don Rocch,
che je refila adess lu a lor,
ma giontandegh lu del so5
tutt la franza ch’el ghe pò.
Ch’el ghe diga pur giò ciar
che mì sont on bon fioeu,
galantomm, che l’è inscì rar
a trovann al dì d’incoeu,10
che per lor sont pussee a taj
che né i ong per pelà l’aj.
Quant al vess scrocch e capazz,
scior don Rocch, ch’el tasa pur.
L’hoo tolt foeura lu dal mazz,15
donch no sont mincion sicur.
Quand tu el jutta i fatti mee
l’induzion la ven da lee.
Franch che gh’hoo on bon quart de luna
per tirà in port el barchett20
tutt starav che la fortuna
la ghe dass anch lee on colpett,
ché costee col zuff postizz
la m’ha faa di gran brutt scrizz.
Né vorrev che in st’occasion25
dal senat la cavass foeura
de quij tal declinazion
che se fava andand a scoeura
e che inscambi d’hic poetta
se sbraggiass: Micca boffetta.30
