Poesie (Porta)/158 - Chi m'ha in del venter stravoltaa i buvij?
 |
Questo testo è completo. | |
Carlo Porta - Poesie (XIX secolo)
158 - Chi m'ha in del venter stravoltaa i buvij?
| ◄ | 157 - Se sont staa darensc a scriv | 159 - Despoeù che tanc poetta han scritt in rima | ► |
Chi m’ha in del venter stravoltaa i buvij?
Che cassia de squittà m’ha miss tant voeuja?
Car el mè Cont, me ciappa adess la doeuja,
smerdi, se no foo prest, fass e pattij.
Parem mì e el camer propri duu fradij,5
caghi giald, caghi ross, e per mia noeuja,
se dura ancmò stà maladetta moeuja,
caghi i oeucc, i busecch, i scinivij.
Come me doeur i oss, Jesus Maria!
Come me senti sloffi e sbatuu!10
Sont tant scansii, pari domà l’ombria.
L’è on pezz, ma on pezz che soo cossa l’è el cuu
ma de pitt ona tanta battaria
né tant scialli de merda hoo mai veduu.
Se duren on dì o duu15
sti sboffer, el mè Cont, sti bej istori
voo a nettamel, par brio! in purgatori.