Poesie (Porta)/12 - Capissi anch mì sur professor Ronchett
 |
Questo testo è completo. | |
Carlo Porta - Poesie (XIX secolo)
12 - Capissi anch mì sur professor Ronchett
| ◄ | 11 - Per incoeu guarna pur via | 13 - Lacrem stee indree... no sbottii foeura, nò! | ► |
Capissi anch mì sur professor Ronchett
che in quant a fà strivaj lu l’è quell’omm
che pò stà impari quand se sia al Domm,
che l’è tra i maravej quella di sett.
Ma quell vizzi fottuu dell’impromett5
e de vess tant de rari galantomm
el fa tort minga pocch al so bon nomm
e, come dighi, l’è on fottuu diffett.
Ma dianzer: coss’hin i mee danee?
Hin merda ch’el voeur proppi ciappann pù?10
Fo el sbirr, el boja, el lader de mestee?
Anzi quant a mestee sem carna e pell,
ché lavorem in-vers tant mì che lu:
mì i penser del mè coo e lu el vitell.