Poesias (Nay)/4
 |
Questo testo è da formattare. | |
| ◄ | 3 | 5 | ► |
Unviern e primavera sils culms.
(Nach Annalas, S. 202, 1902.)
Pegns e larischs scheman staunchels
Sut il buordi freid e criu,
Vid la roma verda penda
Neiv schelada sco vistgiu.
5 La nevada fulenada
Schai sils culms tut ensurin,
Ha curclau muletgs e tschenghels
Ed ils pezs er finadin.
La nevada sulerada
10 Dal solegl risplenda clar;
En colurs schi admirablas
Nin pictur sa malegiar.
Pintga tegia sutterada
Enamiez in ferm cufflau
15 Legher paster cun la tiba
Ha la tegia bandonau.
Pera grescha, pera cloma
Nin mortal ti dat sinzur,
Ni camutsch, ni muntanialas
20 Cattas ti leu adagur.
Mo il tschess si ault els nibels
Vesas ti a traversar,
Tormentaus da fom enquer' el
Salvaschinas d' attaccar.
25 Tgei sgarscheivel, grond silenci!
Tutta veta sto pirir —
El desiert de neiv e glatscha —
En la fossa sto schmarschir.
Giu pellas vals scadeinan lavinas,
30 Ch' ein leventadas dal tribel fagugn;
Caulds e mordents luent' el purginas,
Sfracc' il galatsch e disfa il lagugn.
Vals e darguns ramuran e creschan,
Giu per las spundas se catschan ils dutgs,
35 En las valettas vadretgs uss svaneschan,
Flurs e flurinas cuchegian spels trutgs.
Or sin ils muots ils pasters sepeinan,
Datan enzenas, ch' il matg sei vignius,
Sunan la tiba cun forza e smeinan
40 Festa culeischan e scomian ils grius.