Poesias (Nay)/6
 |
Questo testo è da formattare. | |
| ◄ | 5 | 7 | ► |
Il pegn d' untgidas.
(Nach Annalas, S. 78, 1906.)
Sils confins dell' alp se saulza
Ina plonta veglia, bracca,
Endisada vid garniala,
Vid cametg e tun e dracca
5 En siu best caviertg, foppau
Han furmiclas se casau.
Las ragischs sco ferma bratscha
Stagn embratschan la greppaglia;
Ina frestga aua cuora
10 Serpigiond d' ina sfendaglia
El umbriva d' in cagliom
Frestgentond il sèc sulom.
Contas gadas, cara plonta, …
Hai jeu bein sut tia roma
15 Cun miu bab en compagnia
Ruassau ell' jarva loma,
Dis de matg e temps cametsch,
Frestgentond il suadetsch.
Da stempradas cun miu muvel —
20 Culs darguns smanatschan prighel
Se casaus sut tias tschemas —
Taur e vaccas en marighel —
Has ti giu per mei quitau,
Sai a ti per quei d' engrau.
25 Contemplesch' jeu l' urdadira
Suenter onns e bia midadas,
Eis adina quella plonta
Cul bestun e tschemas ladas.
Jeu salidel tei sfraccaus
30 Da fastidis e quitaus.
Sunel buca pli la tiba
Dis de stad sper la fontauna
Embellend miu fest culeischen
Cullas cotschnas flurs striauna.
35 Prendel oz da tei comiau
Laschel per recommendau —
Tuts ils pasters, la muaglia,
Catschadurs e selvaschinas;
Porsch' ad els segir refugi
40 En fastidis e furtinas;
Dieus per tut vegn tei pagar,
Benedir e conservar.