Poesias (A. Tuor)/9
 |
Questo testo è da formattare. | |
| ◄ | 8 | 10 | ► |
Il senteri.
(Nach Annalas, S. 196, 1898.)
Jeu enconoschel in marcau
Giu el ravugl de nossa tiara;
Negin carstgeun ha aunc dumbrau
Las casas che quel en se siara.
5 Si' arma, quell' ei mo la crusch,
In fleivel mir mo si' ustonza;
Mo tonaton gnanc ina vusch
Po penetrar en quell' avdonza.
La port' ei gronda, bauld e tard,
10 Da di e notg, adin' aviarta;
Siu pass il mund de l' autra vart
Da questa vall de larmas sparta.
Tras questa porta ti savens
Observas enzatgi che passa,
15 Per leu semetter en dadens
En ina casa stretg' e bassa.
Quei ei il liug de ver' uniun,
Quei ei il liug de pasch perfetga;
Cheu mai disturba la pissiun
20 Il sogn ruaus che sin nus spetga.
Negin per caussas de quest mund
En quell' habitaziun s' empatscha;
In sien migeivel, sien profund,
Cheu sco in aunghel tuts embratscha.
25 Il retg, cul diadem ornaus,
Quei um cun rauba, cun pussonza,
Sper siu sbitau subdit satraus,
Cun el tegn buna vischinonza.
Il pign, il pauper senz' albiert,
30 Che tut il mund persequitava,
Cheu alla fin anfl' il confiert,
Che tont siu cor desiderava.
Ti vent suls loghens va bufatg,
Bufatg las flurs e cruschs scadeina,
35 Laventa buc, o dai adatg,
La dultscha sien, ch' ils morts cadeina!
Va speras vi, ti viandont,
Stai éri, aulza la capiala;
…
In „de profundis“ recitond
40 Dals morts sregorda in' uriala.
Beingleiti dormas era ti
En quei marcau, cun quell' armada,
Entoch' il giuvenessendi,
Il di solem de la levada.
45 in aunghel lu el firmament
Cun forza suna la trumbetta;
Udend il „Surgite!“ stremblent,
Tut che banduna la casetta.