Poesias (A.T. Tuor)/11
 |
Questo testo è incompleto. | |
| ◄ | 10 | 12 | ► |
Sin la mort d' ina giuvna.
(Aus Il Pelegrin, Nr. 6, 1913.)
Sco la rosa, che flurescha
Sin curtin da mesa - stad,
Da bellezia resplendescha
Pli che tuttas flurs, ch' ei dat,
5 E cuvretga da rugada
Para la damaun mervegl,
Dall' aurora sco bugnada
Sut ils radis dil solegl.
Sco la rosa terlischonta
10 Cara giuvna fuvas ti;
In carstgaun cun grazia tonta
Ves' ins mai sin tiara pli.
Senza fraud in aunghel mava
Ina sera sin bunfin,
15 E siu égl ch' entuorn mirava,
Catta tei aunc alla fin.
Ed igl aunghel sesmerveglia
D' entupar tei sin quest mund;
Tiu maunet cun prescha peglia,
20 Ed el di, bitschond tiu frunt:
„Di, tgei fas ti cheu sin tiara?
Car affon, neu po cun mei!
Dals embrugls ch' ell' en sesiara,
Pertgirar vi semper tei.
25 Vesas co la notg, la stgira,
Gleiti vegn a serasar,
E damaun vegn la scheltira,
Che la rosa fa seccar.
Cheu, sch' il cor in di fa fiasta,
30 E sche tut stat en splendur,
'Gl auter di vegn cun tempiasta,
Cun anguoschas e sgarschur.
Senza tema, senza peina
Viver san ins cheu negliu,
35 La ventira, la compleina,
Porscha mo 'gl azur stelliu.
En las tiaras celestialas
Primaver' ei sur tut onn;
Ne purginas ne garnialas
40 San leu far il mender donn.
Mez jeu sundel leu da casa
Sut in auter firmament,
Che splendur nundetga rasa
Sur in auter scaffiment.“
45 Ella cheu de ver carteva
Sur ils nibels in marcau
Che cun aur surtratgs pareva,
Sco sch' ei fuss in siemi stau.
Ussa semettend sin via
50 Maun en maun van tut beai,
Ed en quort a casa sia
Omisdus ein arrivai!