Poesias (A.T. Tuor)/10
 |
Questo testo è incompleto. | |
| ◄ | 9 | 11 | ► |
Il casti de Darvella. (Aus Il Pelegrin, Nr. 12, 1911.)
In mir perdetga deva
Din vegl e grond casti,
Che sur Darvella steva
En tschentaners stuli.
5 Sche cuolms e precipezis
Tremblavan dal cametg,
Il mir en tuts urezis
Aunc steva ferm sidretg.
El steva sc' ina petga
10 Ord crappa grischa fatgs
Sco ina veglia detga
En siemis e pertratgs:
En siemis de battaglias,
De lutgas e saung spons,
15 De truschas e travaglias
Suffridas onns ed onns.
Vesev' en redunonza
Rimnai nos bravs babuns,
Udeva dall' avdonza
20 Las tibas e canzuns,
Da notg las tschalareras
Cun stermentus fracass
Sgulond tras las tschagheras,
Sco, sch' ina bova mass.
25 Giu bass il Rein rucclava
Las undas sco pli bauld;
Sil tgiembel sesalzava
Il mir aunc jer ad ault;
La petg' ei oz stulida
30 Naven dil tuttafatg:
La tiara ch' ei stremblida
Ha lunsch la crappa tratg.
Il temps va sco cun roda
E derscha tut sutsu;
35 En emblidonza croda
Tut quei ch' ei stau zacu.
Pli tard ins forsa scriva
Sur d' in casti sfundrau —
Mo tgi ch' allura viva,
40 Sa dir, nu' quei ei stau?