La polpetta del Re/Quader XII
 |
Questo testo è stato riletto e controllato. | |
| ◄ | Quader XI | Quader XIII | ► |
QUADER XII.
Mader e Fioeu.
Da ona part la tór dove ghè saráa dent el Scianin. — Tecc de casasc intorna e mur de fortezza; el palazz real in fond. — L’è nott. — Luna.
El Scianin (in preson).
| Gnao! Gnao!... Pover’a mi! Quand vegnaroo foeura de chì, |
Ona Vôs (de lontan).
Scianin! Scianin!
El Scianin.
Chi l’è che m’ha ciamáa?
Asen che sont! Chi l’è che pò ciamamm!
Chi l’è che anmò pò regordass de mi?
De mi, poer disperáa,
nassuu per savè no come mangià,
e sulla forca condannáa a morì
perchè sont vorsuu andà
a contra el mè destin!
La Vôs (men de lontan).
Scianin! Scianin!
El Scianin.
Ma... Eppur...
La Vôs (de visin).
Scianin!... Scianin!
(La Scianna la compar sora on tecc).
El Scianin.
Ah, questa l’è la vôs de la mia mamma!
O mamma, te set ti?
Te set ti che me ciamma?
La Scianna.
Sì, el me tesor! Sont mi!
Ah, Signor, ve ringrazi! L’hoo trováa!
(la salta visin al finestrin de la preson del Scianin).
El Scianin.
Oh, mamma, el to Scianin l’han condannáa!
Doman saroo impiccáa!
La Scianna.
Tas! tas! Per caritáa!
Strasciom no el coeur!... El soo!
El Scianin.
E t’è stáa ditt
Cossa l’è el mè delitt?
La Scianna.
Soo tutt!... Ah, el mond l’è gramm!
El pussèe gran delitt l’è d’avèggh famm!
I lader de milion
hin trattáa cont i guant!... Ma se on strascion
el roba on ghell, ghe no de compassion!
A vèss la Scianna d’ona portinara
per la via di giornai quaicoss se impara.
E, in sti dì, n’hoo sentii d’ogni color!
Alter che on polpettin!
Luganegh longh di mìa, e tucc d’or fin,
hin quij che è stáa sciampáa
da sti lader, che a nun ne dan del lader!
Da sti lader, che, finna, in tra de lor
(robb de mett in d’on quader!)
se roben anca i gatt,
disend: che i gatt robáa
hin quij che in pussee bon de ciappà i ratt!
El Scianin.
Se la sura Lussìa la m’avess dáa
domà on boccon de pan,
avariss no robáa
e andariss no sulla forca doman?
La Scianna.
Ah, tira minga a man!
No!... No! Te devet no morì, el mè Scian!
Finna de piscinin,
mi t’hoo giamò salváa dò volt o tre
perchè voreven tratt in d’on tombin!
S’eri malada de stà nanca in pè;...
pur t’hoo semper tolt su per el coppin,
e t’hoo sconduu che han poduù pu ciappatt.
Adess che t’hoo trováa, voeuri salvatt!
Ghoo giamò el mè progett...
Ciao, Scianin!... Ciao!... Stà col coeur quiett!
El Scianin (s’cioppand a piang).
Ah, mamma, mamma... No... Va minga via!
La Scianna.
Signor,... se voo l’è tutt per el to ben!
El Scianin.
M’han ligáa tanto curt a la cadenna,
che poss moeuvem apenna!...
Podessi fatt almen l’ultim basin!
La Scianna.
L’ultim?... No!... Dì no inscì, ch’el porta arlìa!
A rivedèss, car el me poer velù!
(La va via piangend).
El Scianin (vosand).
Ah... mamma!... Dio!... La vedaróo mai pù!