Il Vangelo di S. Matteo volgarizzato in dialetto milanese/Capp X
 |
Questo testo è completo. | |
| ◄ | Capp IX | Capp XI | ► |
Capp X.
2 I nomm di dodes apostoj hin quist. El primm l’è Simon cont in nomm Peder, e Andreja sò fradell,
3 Giacom fiœu de Zebedee, e Giovann sò fradell, Filipp, e Bartolomee, Tomas, e Mattee el publican, Giacom de Alfee, e Tadee,
4 Simon Cananee, e Giuda Scariott, che l’è quell, che l’ha tradii.
5 Gesù l’ha mandaa attorna sti dodes, comandan degh, e disendegh: Ve mes’ciarii minga cont i gentij, e andarii minga dent in la cittaa di Samaritan.
6 Mа andee putost in mezz ai pegor perduu de la cà d’Israell.
7 Andand attorna pœu predichee, e disii: Ch’el paradis l’è vesin.
8 Fee guarì i amalaa, resuscitee i mort, nettee fœura i lebros, cascee via i demoni: dee via gratis quell, ch’avii ricevuu gratis.
9 Cerchee de tegnii minga in saccoccia nè or, nè argent, né danee:
10 Tegnii minga la bissacca, tegnii minga duu vestiari, nè scarp, nè baston: perchè l’operari el merita el sò sostentament.
11 E in qualunque cittaa o castell, che andarii denter, informev, chi l’è, che merita pussee là denter:: e fermev appress a quell, fin a tant che andee via.
12 Quand pœu andee dent in d’ona cà, fegh el salut, disendegh: Che regna la pas in sta cà.
13 E se sta cà le merita, ghe vegnarà via la pas, che gh’avii auguraa: se peu l’è minga degna, la vostra pas la ve tornarà indree.
14 E se quajchedun ve ricevarà minga, o ve darà minga a trà: vegnend fœura de quella cà, o de quella cittaa, fee giò la polver di voster pee.
15 In veritaa mì ve disi: La sarà castigada men Sodoma, e Gomorra in del dì del giudizzi, che nè quella cittaa.
16 Mì ve mandi come pegor in mezz ai loff. Siev donca prudent come i serpent, e sempliz come i colomb.
17 Guardev però di omen. Perché ve faran mett pé in di compagnij, e ve frustaran su in di sò sinagogh:
18 E per causa mia sarii menaa denanz ai president, e ai re come testimoni contra de lor, e contra i nazion.
19 Ma quand ghe sarii borlaa in di ong, cascev minga de coss’è, o in che manera abbiev de parlà: perchè ve sarà suggerii in quell’moment quell, che avii de dì su.
20 Perchè sii minga vialter, che parlee, ma el Spirit de voster Pader l’è quell, che ve parla de denter.
21 E ’l fradell el consegnarà a la mort sò fradell, e’l pader el fiœu: e saltaran su i fiœu contra i sò parent, e i mazzaran:
22 E sarii odiaa de tucc per causa mia: ma quell, che tegnarà dur fina in fin, el se salvarà.
23 Quand pou ve faran tribulà in sta cittaa, scappee in l’altra. In veritaa mi ve disi, che ghe vedarii minga la fin ai cittaa d’Israell, fin a tant che no vegna el Fiœu de l’omm.
24 Gh’è minga scolar, che sia de pu del maester; gh’è minga servitor, che sia de pu del padron.
25 L’ è assee, ch’el scolar el sia istess del maester: e ch ’ el servitor el sia istess del padron. Se han ciamaa patron de cà Belzebù, quanto pussee i sò servitor?
26 Abbiee minga donca paura de lor: perchè gh’è nient de sconduu, che no vaga a vess squajaa: e nient de misterios, che no s’abbia de savè.
27 Disii pur al ciar quell, che mì ve disi a scur: e predichee sui tecc quell, che v’è staa ditt a l’oreggia.
28 E abbiee minga paura de quij tai, che mazzen el corp, e poden minga mazzà l’anima: ma abbiee paura putost de quell tal, che pò mandà a l’inferna e anima, e corp.
29 L’è minga vera, che do passer se venden per on ghell: e voeuna sola de quist l’andarà minga per terra senza de voster Pader?
30 Ma i cavej del voster coo hin staa cuntaa tucc.
31 Donca abbiee minga paura: vialter varii pussee d’on gran de passer. 32 Donca quell tal, che me confessarà mì denanz ai omen, mì el confessaroo lu denanz a mé Pader, che l’è in paradis:
33 E quij, che me rinnegarà in faccia ai omen, mì i rinnegaroo denanz a mé Pader, che l’è in paradis.
34 Credii minga, che mì sia vegnuu in terra a mett pas: sont minga vegnuu a mett pas, ma guerra.
35 Perchè sont vegnuu a sparti el fiœu del pader, e la tosa de la mader, e la nœura de la socera:
36 E i nemis de l’omm hin i sò servitor.
37 Chi ghe vœur ben a sò pader o a soa mader pussee che a mi, l’è minga degn de mi: e chi ghe vœur ben a sò fiœu o a soa fiœula pussee che a mi, l’è minga degn de mi.
38.E chi no ciappa la soa cros, e no me ven adree, l’è minga degn de mi.
39 Chi ten de cunt la soa vitta, ghe le giontarà: e chi ghe giontarà la vitta per causa mia, le trovarà.
40 Chi ve ricev vialter,me ricev mi: e chi me ricev mi, ricev quell tal, che me manda.
41 Chi ricev el profetta in nomm del profetta, ricevarà la paga del profetta: e chi ricevarà on sant’omm in nomm d’on sant’omm, ricevarà la paga de galantomm.
42 E quell tal,che gh’avarà daa de bev domà on biccer d’acqua fresca a vun de quist pussee piccoj, come a on scolar: in veritaa ve disi, el ghe giontarà minga la soa paga.