Il Vangelo di S. Matteo volgarizzato in dialetto milanese/Capp III

by Antonio Picozzi

Capp III

../Capp II ../Capp IV IncludiIntestazione 8 dicembre 2023 75% Da definire

Questo testo è completo.

Antonio Picozzi - Il Vangelo di S. Matteo volgarizzato in dialetto milanese (1859)

Capp III

◄

Capp II

Capp IV

►

Capp III.

I

N quell temp là è vegnuu Giovann Battista a predicà in del desert de la Giudea,

² E ’l diseva: Fee penitenza: perchè el paradis ghe l’emm ai spall.

³ Perchè quest chì l’è quell tal omm, che l’ha parlaa Isaia profetta, disend: La vos de quell, che sbragia in del desert: Preparee la strada del Signor: tiree drizz i sœu sentee.

⁴ E lu l’istess Giovann el gh’aveva ona vesta de pell de camell, e ona zenta de coramm in vitta: e ’l sò mangià eren locust, e mel salvadegh.

⁵ Allora andava là de lu Gerusalemm, e tutta la Giudea, e tutt el paes intorna al Giordan.

⁶ E quand gh’aveven confessaa i sou peccaa, je battezzava in del Giordan.

⁷ Ma siccome lu el vedeva a vegnì a fass battezzà tanti Farisee, e Saducee, el gh’ha ditt: Razza de viper, chi ve insegna a scappà via de la rabbia, che dev vegni?

⁸ Fee donca di frut degn de penitenza.

⁹ E no me stee a dì denter de vialter: Gh’emm Abramm per pader. Perchè mì ve disi, ch’el Signor el pò fà saltà fœura de sti prej di fiœu de Abramm.

¹⁰ Perchè la folc l’è giamò a la radis di piant. Donca ogni pianta, che farà minga bon frut, la sarà tajada, e drovada de fà fœugh.

¹¹ Per adess mì ve battezzi cont l’acqua per penitenza: ma quell, ch’ha de vegnì dopo de mi, e che mì ghe porti nanca adree i sciavatt, lu el ve battezzarà cont el Spiritusant, e col fœugh.

¹² Lu, cont la soa pala in man, el nettarà la soa era, e’l calcarà el forment in granee; ma el brusarà la paja cont on fœugh, che se smorza pu.

¹³ Allora Gesù l’è rivaa de Galilea al Giordan in de Giovann, per vess battezzaa de lu.

¹⁴ Ma Giovann nol voreva saveghen, disend: Mì gh’ hoo bisogn de vess battezzaa de tì, e tì te vegnet de mì?

¹⁵ Ma Gesù el gh’ha rispost, disend: Lassa fà per adess: perchè inscì ne conven a fà per vess in regola. Allora l’ha faa a sò mœud.

¹⁶ Gesù, penna battezzaa, l’è vegnuu foura de l’acqua. E ecco che ghe s’è dervii el ciel: e l’ha veduu el Spirit del Signor a vegnì giò come ona colomba, e fermass sora de lu.

¹⁷ In quell menter s’è sentii ona vos del ciel, che diseva: Quest chì l’è el mè fiœu, che ghe vuj ben, e in lu me sont compiasuu.