 |
Questa pagina è stata trascritta e formattata, ma deve essere riletta. | |
| 8 | S. MATTEE. |
tanti Farisee, e Saducee, el gh’ha ditt: Razza de viper, chi ve insegna a scappà via de la rabbia, che dev vegni?
8 Fee donca di frut degn de penitenza.
9 E no me stee a dì denter de vialter: Gh’emm Abramm per pader. Perchè mì ve disi, ch’el Signor el pò fà saltà fœura de sti prej di fiœu de Abramm.
10 Perchè la folc l’è giamò a la radis di piant. Donca ogni pianta, che farà minga bon frut, la sarà tajada, e drovada de fà fœugh.
11 Per adess mì ve battezzi cont l’acqua per penitenza: ma quell, ch’ha de vegnì dopo de mi, e che mì ghe porti nanca adree i sciavatt, lu el ve battezzarà cont el Spiritusant, e col fœugh.
12 Lu, cont la soa pala in man, el nettarà la soa era, e’l calcarà el forment in granee; ma el brusarà la paja cont on fœugh, che se smorza pu.
13 Allora Gesù l’è rivaa de Galilea al Giordan in de Giovann, per vess battezzaa de lu.
14 Ma Giovann nol voreva saveghen, disend: Mì gh’ hoo bisogn de vess battezzaa de tì, e tì te vegnet de mì?
15 Ma Gesù el gh’ha rispost, disend: Lassa fà per adess: perchè inscì ne conven a fà per vess in regola. Allora l’ha faa a sò mœud.
