Il Vangelo di S. Matteo volgarizzato in dialetto bergamasco/Capo XVI
 |
Questo testo è completo. | |
| ◄ | Capo XV | Capo XVII | ► |
Capo XVI.
2 Ma lü al gh’à respondit a lur, e’l gh’à dec: A la sira voter disì: Al farà bel tep, perchè ol siel l’è ros.
3 E a la matina: Incö al farà temporal, perchè in aria al gh’è di niolù nigher e ros.
4 Doca oter sì bu de distingui la cera del siel: e no rié miga sö a cognos i segnai di tep? Rasa infame e adultera la sirca ü prodigio: nè’l ghe sarà consedit oter, che quel de Giona profeta. E piantac costur, a l’è ’ndac vea.
5 Ades mo i sò disepoi quanda i ’ndaa per treersà ol lag, i s’era dösmentegac de to dol pa.
6 E Gesü al gh’à dec: Tegni vert i öc, e fidef miga dol leat di Farisei e di Saducei.
7 Ma lur i staa lé penserus, e i disia: Perchè m’à miga tölt dré dol pa.
8 Gesü, che ’l cognosia sta fasenda, a l’à dec: Cosa stef lé a machinà det de oter, zet de poca fede, perchè no ghimiga de pa?
9 No pensef gnamò, nè v’ ricordef di sich pa per i sich mela omegn, e quace caagne a n ’ ì regoit?
10 Gnè di sèt pa per quater mela omegn, e quace sporte a n’ì portat vea?
11 Come no capif miga, che mé no v’ò miga dec söl proposet del pa: Fidef miga del leat di Farisei, e di Saducei?
12 Inalura a i capé, che l’ia miga dec de vardas dol leat del pa, ma da la dotrina di Farisei e di Saducei.
13 Gesü po, che l’era ’ndac di bande de Cesarea de Felep, al domandé ai sò disepoi, e ’l ghe disia: Che dighei i omegn, che ’l sees ol Fiöl de l’om?
14 E lur a i à respondit: Vergü a i dis, che lü a l’è ol Gioan Batesta, di oter Elea, di oter Geremea, o vergü di profeti.
15 E Gesü a l’à dec: E voter chi disif mo, che mé sees?
16 Simù Piero al respondé, e’l disia: Té te sé ol Crest, fiol del Siur vif.
17 E Gesü a l’à respondit, e ’l gh’à dec: Beat té, Simù Bar-Jona: perchè no ’l te l’à miga fac cognos la carne, o ’l sangh, ma olmé Pader, che ’l sta sö in siel.
18 E mé dise a té, che te sé Piero, e sura sta preda farò sö la mea cesa, e i porte de l’inferen no i la pödirà miga contra de té.
19 E mé te darò i ciaf del paradis. E töt quel, che t'avré ligat ché so la tera, al sarà ligat ach in siel: e qualunque roba t’avré desligat in tera, la sarà desligada ach in siel.
20 Inalura a l’ordené ai sò disepoi, che no i dises a anima, che lü al födes Gesü ol Crest.
21 D’alura in po Gesü al scomensé a faga capì ai sò disepoi, che lü al bisognaa, che l’indes a Gerüsalem, e che al doses soportà asé dai piö vec, e dai Scribi, e dai capi di prec; che ’l födes copat, e che’l resüsites ро ol ters dé.
22 E Piero al l’à ciapat de banda, l’à scomensat a vusaga dré, e’l ghe disia: Nol sarà mai vira, o Siur: a té ’l süsederà sta roba de sta sort.
23 E turnat a voltas vers a Piero, al gh’à dec: Ritiret de mé, demognio, che te m’sé de scandol: perchè no te ghé miga la braüra del Siur, ma quela di omegn.
24 Inalura Gesü al gh’à dec ai sò disepoi: Chi völ vegnim dré a mé, al se dösmenteghe afac de lü stes, al ciape so la sò crus, e ’l me egne dré
25 Perchè colü, che ’l völirà salvà l’anima sò, al la perdirà: e chi ’l perdirà la sò anima per mé amur, al la troarà.
26 Perchè cosa giuel a l’om ol guadagnà töt ol mond, se po al perd l’anima? E cosa daral ol om in cambe de la sò anima?
27 Perchè ol Fiöl de l’om al vegnirà in del mez de la gloria del sò Pader coi sò angei: e inalura al darà a töc segond ol meret.
28 Mé ve dighe in verità: In mez a ques’ce ,che a i è ché presenc, a ghe n’è de quei, che no i mörirà miga, prima che no i abie vest ol Fiöl de l’om a ’ndà det in del sò regno.