Prose ladine bellunesi/Parchè che l é meio no fumà
 |
Questo testo è incompleto. | |
| ◄ | 4 | Prose ladine bellunesi | ► |
ANGELO SANTIN STRAFIT
Parchè che l é meio no fumà
Anca mi ai fumà co ere doen e aée vint aign, donca no n é che no sape chel che vol dì. L é na gran porcaria! Se scomenza così, senza saé parchè, par fà come chi autre, par se saé de ese … O anca, come che me é sozedù a mi, par se fà pasà l mâl de deinc’, come ch’i me aea dat da intende chi autre tosat! Dapò se sa come che la va a fegnì … Anca mi, al mâl de déinc’ an sin al me era pasà, parchè che me aee insemenì con chela prima zigareta, ma dapò …: laga ia ti, se t’ees boon!
Bona che sto viz al me à durà “solche” doi o trei aign, no sai pi giust, e l dì del prim esame de Università ai metù orden de lagà igliò. E così ai fat, dal dit al fat, parché che ai volù (e no sté a crede che n fumase pùoche…). E gnanca no n ai fat fadiga, parchè che, par … fortuna, aee scomenzà edùt a sborsegà burt, e, seanca che aee pena ciapà inte a studià da dotoor, aee capì alolo che no pudee dì inaânt con chel inviameent.
Ma no n era gnanca la tos e l catar che sgargociae fùora che me fea stà pi mâl de dut e che me à daidà a lagà ia: l é inveze che ogni ota che ere n sin avelì, canche aee valch, de pùoch o de cotânt, che no me dia dal bon vêrs, me tacae inbota inte la zigareta, co la idea, te pos crede! che fose chela a me daidà…
Na roba che me fea an grum de rabia, che me la pudea propio, parché che se capis che, co sto molin, no n ere paroon de mi, no n ere mi che me comandee, ma le mie rabie, le mie lune doerse, o l pachet de zigarete!
E l é naturâl che, dapo che ai desmetù, son stat inbota meio soraldut de sto vêrs.
E come (debota) duti chi che à fumà e che po i à lagà ia, me fà fastide n grum al fum e chi che fuma, e no capìse – pi ch’i no sie tosat, che se cré de saé e pudé fà dut - come ch’i faze a fumà… senza aé n sin de pensìer, e a no le proà dute par lagà ia, dato ch’i se tôl la vita (i se fâs mâl) da soi.
E sì che l é scrit indapardut che, se la déent la lagase ia de fumà, se deliberesone inbota del 80 par zento de duti i tumoor di polmoign. E seanca che n é cotàinc’ che no cré che la sie così, al fum de le zigarete al fâs cotânt pedo de dut chel che trâs fùora le machine e le fabriche metude insìeme, e anca de l amianto!
E no sarae gnanca da menzonà al fum ch’i cognon parà dù chi pure cristi che no fuma ma ch’i stâs su par pede de chi che fuma. Ocor amete però che adês, in ultema, la và an sin da meio, e anca chi da le zigarete i à inparà a aé n sin de creanza, se no autre con dute chele tabele ch’i à scomenzà a mete fùora inpardut, che l fum al nùos, e con chel ch’i predichea su par chi giornai e televisioign.
Penseve che solche in Italia duti i aign n é pi de zentomile che muor gausa ch’i fuma, e trei milioign inte dut al mondo; e che par i stà daré a chi che fuma e ch’i se mala parchel, se spent duti i aign debota novantazinch miliardi.
No ‘n aeo asai? Alora ve dighe ncora valch. Chi che fuma l é vint ote pi fazile de chi autre ch’i se cure su an tumoor di polmoign; e pi de mêz de chi che fuma e che muor co i à dai 45 ai 60 aign i mùor gausa ch’i à fumà. Me par che l é dute robe da pensà sora cotânt …
E pò ncora. De sti aign, l é pichesie chele femene che fuma senpre de pi, con chela de no volé ese al de sot de chi om, gnanca inte le asenade: e par fà polìto, le é nca senpre pi doene chele che ciapa inte. Inbota le no s’incôrz gnanca cuânt mâl ch’i fâs, parchè che l velegn che te pare dù al stà an sin a laurà, daìnte, de scondoign. Ma de là de n puochi de aign … sozìet an cuarantaôt inte l côrp! Par an dì una: del ’65 an morìa ogni an 26.000 femene in Europa, gausa l fum; del ’90, dapò 25 aign, n era 90 mile a l an che morìa. Se dion inaânt così …
Saimi che, forsi, no n ai dit cotante robe nuove, le aaré sentude se ocor an grum de ote, che saré autre che stuf, soraldut voi che fumé e che, se sié lugai a lìede fin chilò, me aaré nca mandà inte chel lùoch! Che po par solito, co s’i dis valch o che t’i faze oservazioon, i te respont, ridant: “Ehhh! Lagheme fumà! Da valch ocor morì, no” Pardiana, se l é vera; ma parchè voleo dì propio a ve la zercà? Parchè voleo morì in presa?
E pò mi faze coont che a le dì, e a le scrie, par zoldân, chi che fuma i faze an sin pi acaso a ste robe, i faze an sin pi de fadìga a fà afenta de no le aé mai sentude. E i se proe a lagà ia de fumà.
Dapò che, ai prim de genaro, no se pùol pi fumà inte cotainc’ lùoch, se n à sentù de duti i coloor! Soméa ch’i e abe toot al fià de boca, a sti pùore caign che fuma! Somearae debota che fosone pedo che col Duce, o in Rusia, o diosà andoe … Deve na chiatada, su ia!
Mi no vade d’acordo gnanca n sin co sto goerno, parchè che i à laurà pichesie par se fà i fati sùoi, e soraldùt chi de sa paroon, e se la va béen de chi pi siori; ma par sta roba del fumà me cognon améte, e no faze fadiga, ch’i à fat propio polìto!
Chi che vol seguità a se invelenà i é paroign de dì inaânt come ch’i à senpre fat, pardiana! Ma se no autre ocor ch’i inpare a aé n sin de respêt par chi autre, chi pure diaoi che no fuma e ch’i no va insaè de se insorventà canche l é valgùinc’ de chi veziai ch’i luga dintoor.
Me é nca sozedù de lìede ch’i pudea se sparagnà de fà dut sto cuarantaôt co l fumà, dato che l dan pi grant par la salute l é le fabriche che l fâs, e “contra” le fabriche no se fâs gnia … Ma nca chesta l é na cabola, parchè che chi che se n intent an sin i sa polìto che l nuos de pi al fum de le zigarete de chel de le fabriche.
E po l é nca chi che fuma che me à dit: “Adês, che vobe o che no vobe, fume nca mi an 30% de manco” Parché po? “Eh par forza, a no pudé pi se la inpizà sul laoro, inte bar, de cà e de là”. E se capìs polìto che no i ndispiâs po così cotânt de “cognì” fumà demanco: i sa nca lori che no sarae propio da fumà, i à solche bisoign de n sburloon …
(Zoldo)