Prose ladine bellunesi/2

Giuseppe De Sandre

Colonbo ../1 ../3 IncludiIntestazione 3 agosto 2015 25% Da definire

1 3


GIUSEPPE DE SANDRE


COLONBO


“Se trata de doi viére, nó conta!”


Stories de pi de zincuanta ane fa

A San Vido, intor al zincuanta, i Padri Cavanis, che i aea la sò scoles al Dolomites, i à betù su al liceo sientifico; così tré de nos, Luciano Frize, Ivo de chi de Saler e ió, che aeane fato al ginasio da lori, son dude a Cortina da Antonelli.

“Ma anche Antonelli l à solo al liceo sientifico” - l à dito, canche al l à saù, Bepo Nenòs, che l era pratego, parché a Cortina l aea fato l aviamento. E sgorlando la testa: “No capiso come se puose crede de dì da Antonelli anche se se à da fai l istituto noutico!”

“Sì, ma nos i ne à tolesto isteso - i aon respondù – dapò i vedarà ce che ocorarà par chel'outra materies”.

Al Nenòs, che, fate i tré ane de alberghiera, l à senpre studià par conto sò e, par nó sbaliase, nó l à mai betù pè ize na scola (o meo, al lo à fato solo par fai i esames) e l é deventà profesor de scola ordenandose ogni an libre e programes e rangiandose da solo, o duto al pi tolendo carche lezion da Ovidio Zalon e da Tizian Coleti, no l aea torto; ma a nosoutre la n'é duda polito, parché l’unica aluna del liceo sientifico l à lasà ia cuasi subito e così son restade paroi del canpo.

An dì, no me recordo ce festa che l era, duoiba grasa o l ultimo de carnaval o ce outro, la leziones les é finides prima, ma sicome ocorea spetà lo steso al treno, son restade là ancora an tin.

Canche l é sta ora de dìseno, s'aon incorto che al porton l era serà.

Se fusesane stade al dì de ancuoi, aesane fato fuó e fiama, ciamando dute tré a ciasa co l nos telefonin e da ciasa i arae ciamà, ce saipe, magare i ponpier e l indoman ghin avarae parlà i giornai e Telecortina, ma alora la regola l era chela de rangiase da sole, come che insegnaa al Nenòs, e così no se son gnanche insoniade de dorà al telefono de la segreteria par ciamà carchedun. La scola l era betuda ize chela che ades l é la “Ciasa de ra Regoles”. Aon verto na fenestra su la strada che và dó a la Difesa; ereane al secondo pian e, vardando dó, staseane pensando a soutà su 'n grun de nieve che l era iusto sote de nos, canche aon sentù: “Ce faseo, riede?”. L era Aurelio Panéto, che al lauraa là a Cortina.

“Son restade serade de ize e golesane soutà dó”.

“No, l é an tin masa outo, e l nieve l é duro; podesà faive argo! - l à respondù Aurelio, che l à subito raionà da chel ponpier volontario che l era – Ve adìo ió”. Dito, fato, l à tolesto nasacé bancia che l era là, al l à poiada sul muro e l é montà su.

“Ades, proà a bete fora la ianbes, par vede se vado a ora a ciapave e faive dì dó panpian”.

Un de nos, me par Luciano, al se à sporto fora, ma, ce che no l é, co 'n pè l à tirà sote su an telerin che l é dù a finì sul nieve duro ronpendo i viere in zento toche, par fortuna zenza tocià Aurelio, che no l à dito nia, l é desmontà dó, l à tirà fora dute i viere rote e l é tornà su a sporde al telerin a Luciano, che intanto l era tornà ize e al l à betù al sò posto. A prima vista, no se s'incordea de nia.

E Aurelio: “Stasé calme! Ades un a l'ota beté fora la ianbes e ió ve ciapo e ve molo dó panpian”.

Prima aon bucià dó la carteles, stasendo ben atente a no fai dan a nisun e dapò se aon molà dó fin che se son sentù brincà e tramudà par tera: l é sta pì fazile de chel che se credea.

“E par la fenestra?” aon domandà.

“No stasé a ghi pensà; se trata de doi viére, nó conta!”

“Sì, ma ce aone da fai doman?”

E Aurelio, serio, dapò aé pensà su an tin:“Vos no stasé a dì nia, ma se i ve domanda argo, ocore che diseve duto”.

Anche al consilio l'é stà iusto. L indoman Antonelli in persona l é dù in avante e in dòs, domandando de cà e de là cume che fuse posibile aé la fenestra al sò posto e dute i viere rote par tera, intanto che la scola l era restada serada. Sote tiro i era chi pì senestre, che, come suziede pi de carche ota, no i aea nesuna colpa; a nos tré, che ereane i pi vece e no se mesedeane mai coi pi pici (l era anche la medies), e no ereane mai de medo canche suziedea argo de storto, nesun a mai pensà de fai domandes; ereane, in carche maniera, “al de sora de ogni sospeto”.

L indoman ancora, sul treno de la bonora, Aurelio l à domandà: “E alora?”

Aon fato mòto che no l era suziedù nia. Par risposta a ‘n outro mòto, che golea dì: và ben cusì. Someaa inposibile che nesun de chi che i era pasade par de là se fuse interesà a nosoutre e no aese dito argo a la scola, gnanche de la fenestra; ma Aurelio al saea che a Cortina, sora l duto in staion, dute pensa ai fate suoi e no i và a intrigase co na manovra che, daspò duto, no aea nia de scònto e de sospeto.

(San Vido)