Prose e poesie bellunesi 2010/14
 |
Questo testo è incompleto. | |
| ◄ | 13 | 15 | ► |
PATRICK GANZ
En Pianeza a fà fen.
De solito stente a levà su bonora,
ma stamatina no vede l ora.
Enpize el foch, par vinze el fret,
beve el cafè e son beleche dret.
L é ancora scur, no se vez en bot,
me ciole na pila e varde su sot.
No l é na giornada de chele pi bele,
le neole ié basse e no se vez le stele.
Ma avon da dì su en Pianeza a segà,
el sol al Signor gaviane ordenà.
No pos stà cua a ghe pensà su n ora,
vade istes e magari el fà fora!
Ieri sera ai parecià el rusach,
e par esse segur de no me ciapà fiach,
ai metù inte braciole e pastin,
e en toch de salame taià du fin.
La polenta la fon lassù, de segur…
… donte anca en cin de formai de chel dur!
Me par che no manche proprio pi nia,
ma en litro de vin no me l porte via?
Co la refa così cargada,
basta vardala par fà na sudada.
Me mete i scarponi, me ciole el restel,
me varde ente specio, son proprio el pi bel!
No faze en tenp de catà la bareta,
che chi altri mat i é già là che i me speta.
Sul trator i s à già comedà,
e senza dì nia i l à de bota enpizà.
Fin su ente le Giare reston montai,
e da là don a pè su par chi prai.
Entant che me ferme a tirà en cin el fià,
me gire endrio e me vien da pensà.
No sion pi tanti che à ancora passion
de mancenì viva sta tradizion.
“Co la lopa che cres enta mez al paes,
a fà chè di a segà onde che no la cres!”
Con sta frase enbezila, prest se desbriga,
chi cuatro balube che no vol fà fadiga.
No i capis che l adorch no l conta nia…
se se passa na giornada en sincera conpagnia.
Entant che riflete me torne envià,
l é meio che vade se voi arivà.
Ma drio na curva, sot an fagher,
cate na fauz, na pèra e en coder.
Fra corde e carucole, forche e restiei,
vargugn s à cargà pi del podei.
Segur s à pensà en cin de peso smaltì..
me faze coraio e i porte su mi!
L é cuasi le set e oramai senza fià,
me manca na pica e son debota rivà.
Ancora doi varech e la baita la sponta,
co se riva fin cua la fadiga no conta.
Enpoie la refa e me faze en panet,
me mete na maia parchè ai en cin de fret.
Me pausse na s-cìanta, ma no proprio tant,
bisogna segà se volon di ndavant.
Mi tache de sot, ti vai fora sul pian,
così se dison co la faoz ente man.
I grandi che sega, i tosat fà rodela
chi pi furbi comanda co le man nte scarsela.
Ai sentù anca doi goze, chissà che no l piove,
desfon fora sti antogn, l é meio se move.
Esto proprio segur? Ma se l à sarenà,
par mi te te sbalie, te t avarà sbavà!
A le dies sponta el preve, sidià, pien de sef,
che el se agita e el ziga anca entant che l bef:
“No sté proà a ve desmentegà,
che la domenega bisogna santificà!”
Co na vecia taola che fà da altar,
ornada coi fior tirai fora da n mar,
sot a le crepe che fà da cornis,
l é proprio così che el Signor se capis.
La predica, enfati , la par senper curta
cande che ensieme auna se se sturta.
Ente sto bel momento el nost pensier el và
a chi che i é dut senza podei saludà…
A Messa fenida la ora la sona…
no l é el tenporal ma la panza che tona.
Meton su la polenta, fridon el pastin,
co la facia contenta de chi à beù vin.
Entant che sion tuti drio taola a disnà,
sponta trei slach belche pronti a magnà.
“Sen passadi par caso e ghe gera baor”,
sarà anca così, ma par mi i sent l odor.
“Gavemo anca noaltri un pocheto de formaggio”,
e davant a la polenta i se met a proprio agio.
Speron se no altro che co i à fenì de magnà,
i se ciole en restel e i ne daide a otà.
Cosita aon pensà e cosita i à fat,
i é dut a otà e i s à godest come mat.
Ma no i é del mestier, par cui no i capia,
che otalo doi volte no serve a nia.
Somea da no crede che ente na giornada,
partida bonora co na segada,
col caldo de agosto, fin che el sol el fà lum,
se no ston atenti el fen fà fierum.
Ades che l é sech avon da pensà:
con tuta sta erba chè aone da fà?
Fone na velma o fone biei fas?
Parchè tralo de mal a noi no ne pias!
Come na volta penson de fà
e du par valon i fas fon fis-cià
Conton le corde e cosita saon
che de segur de pi no ghe n fon.
Voi provà mi el fas a ligà!
Valent, bocia, ti taca a saltà.
Varda chi grandi a tirà la spola,
che ste robe no te le enpare a scola!
L é senper chel un, el pi ciacolon,
che no và mai ben nia: che “no t es proprio bon”
“Chel piester l é piciol, chel altro l é grant,
àsseme a mi se volon di en davant.”
Ma en atimo dopo, co l tira su el fas,
ghe pasaa la voia e alora el tas.
Fin du al cavalon co la testa cargada
el riva sfenì e co la rabia passada.
Cande che ben aon fenì de engrumali
bisogna valgugn che vade a ciapali.
Vade du mi e co ben son rivà
tire la corda e la faze sgorlà.
Senti chesto come che l ziga
L é la carucola vecia che fà fadiga.
Speron che l Signor el ne la mande bona
e scolton fin cande che la corda la sona.
Sion stat fortunai , l é passà du,
sion proprio segur parchè a bate aon sentù.
Ghe n é ancora un e dopo aon fenì,
no me par vera, no ghe n podei pi!
E co riva du el fas co la noiza ornà,
el laoro aon fenì e podon se paussà.
Ringrazion el Signor che l é dut tut ben..
Se vedon n altro an su en Pianeza a fà fen.
(La Valada)