Prose e poesie bellunesi 2008/8
 |
Questo testo è da formattare. | |
| ◄ | 7 | 9 | ► |
PIETRO MENIA (1927)
Cuan che s à burdó l tabié di Santins.
Una dl robe che m à tanto inpressionò da pizal é stó l vede, pr la prima ota, cal gran fuego che cuardea duto cal tabié ch se cetea lolo al inizio dla Duda.
Pr me, era scomnzò duto cu n sonà dl cianpane a martel e l vede pl strade la dente che coré su verso Pieza, spavntada, passando la os d core in Vilapizla ch burdé n tabié. Duce nei canaie, curiose d vede chié ch sucedea, se son bicede in medo ai greign e, ruede davdin l Comun, on visto a tiré fora, da n local sora l Caselo, la ponpa, mai vista inante parchiè che forse i l avé conprada da pueco.
N esistea nè ponpiere, nè boche d’incendio. La guardia, cu n puece de omi, à scomnzò a spremla verso Ciorì. Manie e atreze che n cognossone era stade dade ai doign che corendo pi forte, dadé muedo che st manie fos bel pronte e srotolade, davdin l fuego, pena ch ruea la ponpa. A n zerto momento la guardia ordna ch se torne duce verso ceda pr tole sece e seie e betse z Pieza, ilò da la vasca d deposito, pr inpile, passasle d man in man fin gnó che era rueda la ponpa, e ilò dale ai omi pr ch i bicés l’aga zla ponpa. I canaie deve tole l seie svuetade e riportale z pieza pr inpile da nuevo.
N tin pr dasse inportanza, n tin pr sintisse brave com chei ch s passea l seie piene, nei on seguù la guardia fin che on visto sto fuego ch avé bel ciapò duto l cuerto e l fiame gné fora anche dal fonestrute dl stale, parchié ch burdea anch al fien che era tomò du cui sofite. L ciaudo gné su fin dal prime cede e nei, duce sguatrizede, corone a tole seie vuete pr riportale z pieza a ciariale.
Cuanto ch ebia duró sto fuego e cuanto che seia srvida la ponpa, propio n savarà pi dì. M rcordo solo che i dis dopo duce nei tornone a vede chié che era rstò dal tabié e vdone solo mur negre e, d fora, tassoign d bocoign d trave e d breie mede burdede. Tra la dente t sintìa a dì che era stó dó fuego ma pr nei valé solo cl esperienza ch n avé fato capì cuanto inportante era stó l organizé, l bete in pes la ciadena d omi e femne ch à podù dà aga ala ponpa così lontana da la vasca d deposito.
E, pr n ota, anche se son ruede a ceda cui vstis sporce u biandade, l nostr mare ne à lassade in pas u forse l ne à anch dite “brave”.
(Danta)