Prose e poesie bellunesi 2008/7
 |
Questo testo è da formattare. | |
| ◄ | 6 | 8 | ► |
IRMA MENEGUS RASA (1933)
Faisse mal a dì in cuceta.
L era l inverno del 1944, l ultimo an de guera. A scola, reane ize la cuinta classe del maestro Dordi. Credo che ghen see ancora che se recorda de el: l era an grun severo. Insoma, reane dos a coreie i conpite che aeane scrito al dì prima. Cul cuaderno verto agnó che l era al conpito, un al ota diane su dal maestro, e al meteane su la scrivania dante de el. El al vardaa an tin, e se al vedea argo che no l i dia, al ciapaa al cuaderno e l al tiraa dos de la classe. Cuasi ogni dì vedeane an cuaderno che ausolaa par aria. Intanto, l era ruà a la pora creatura dante de me, e l era dos dighe na corona de “testa dura” o de “ce asto scrito ca?”… Ió ero là che tremao de paura, parcé dapò m arae tocià a mi mostrà al cuaderno. Duto ize an colpo, an rumor tremendo che al ienia da fora, verso Borcia, l à fato tremà la scola. In pi, sentiane i aeroplane che passaa par sora, anche se reane ormai usade parcé al sucedea cuasi dute i dis. Al maestro al se à fermà, al s à levà su e l é dù fora de classe. Dapò de an tin, intanto nos aon tirà al fiado, l é tornà in dos a me dì che an aeroplano l aea fato soutà na bonba de fora de San Vido e al m à mandà dute a ciasa. Contente beate, aon lassà duto là e son partide a vista. Ió ero apede Lucia d Antonio, camineane par stradon duto cuerto de nieve; l era al nieve outo da par duto. No goleane dì a ciasa parcé saeane che la nostra mares les m arae metù a laurà; così aon deciso de dì a soudolà. Lucia l é duda a tuoi la so cuceta, senza che so mare la se incordésse, e insieme son dudes ize su la strada che dia do dal lago de Mosigo, che la scuminziaa agnó che l era la ciasa de Bepo Pelà. L era na bela strada longa che dia in do, e no vedeane l ora da faila cu la cuceta. I ai dito a Lucia che goleo dì ió dante parcé saeo ben maneà. Così son montades su, ió dante, ela dos e son partides. Ce bel che l era ausolà sora al nieve! La strada l era dreta fin a n zerto punto, agnó che la voltaa a man dreta, e sul cianton l era an palo gran e gros cu an ciodo che spordea fora. Ió saeo del palo, ma me aeo desmenteà, e canche me ai inacorto l era massa tarde. No son duda a ora a voltà, così son duda a bate seco ize l palo cu an colpo tremendo e chel ciodo al me a sbreà la pel sora al guoio. No me recordo de preciso, sai che Lucia, puareta, canche l à visto al sango no la saea ce fai. L à cognù lassame là a sangonà sora l nieve, e l é tornada in dos. An tin dapò l é ruà la mare, che la me à menà fora dal dotor. El al me à metù dies ponte sora l guoio, al me à netà su an tin, e la mare la me à menà a ciasa. Son stada na stemana fora de scola e an grun de tenpo cu la panza negra da la bota. Dapò de chel dì, no me recordo can e se son tornada a soudolà. Doi ane dapò son partida par ienì cà in America …
(San Vido)