Prose e poesie bellunesi 2006/VI
 |
Questo testo è da formattare. | |
| ◄ | V | VII | ► |
Enrico Pescosta “Pacio”
Presepi en Canal.
Chi da Canal tuti i agn, prima che lughe Nadal, i scomenza a se dà le man dintorn par mete ensieme dei Presepi a tema.
Tute le Vile, chi sun pont de n tabià, chi nte na stala, chi sot an sas, le zerca de se fà la rifa a chi che le fà pi bel, con valch de nof e original sul tema sieldù, parcheche la dent che po le visità la posse considerà e aprezà.
L an passà i s’à pensà del tema de le desgrazie, che madecala se sent en giro par el mondo.
No l é fazile se pensà de cala desgrazia catà fora; ogni dì se sent descore de valch de burt che l é sucedù da calche banda. Tra i tanti, che s’à pensà de rapresentà desgrazie sucedude da lonz par el mondo, valgugn i à catà fora de ‘n valch ben pi arente i nost loch onde che vivon: arbandon de l’agricoltura de montagna e del nost teritorio en general, soraltut onde che l é pi descomet.
Che burt vede prai piegn de ziude e manegai o bosc poc o nia rencurai, senza gnanca pi na strada o n piciol troi cenù. L é proprio na desgrazia. Se no se ciapa inte a fà valch par zerti loch, la dirà senper pedo. Su chesta “desgrazia” sarìe tant da dì e fòrsi en’autra bota scrivarai valch de pi.
Entant ve contarai de sto presepio su l’agricoltura tant particolar, nassù da l’idea del Vico da Canal con en pochi de soi soci, che l taca n freo anca l preve del paes, che su par el “Campionato de tiro al vof”, organizà ogni an a Pasca, ntorn ora de Messa Granda, el se l’à n cin ciapada co stì pore cristiagn, chi à bù domai la colpa de cenì na tradizion de agn anorum, co tut el rispet par el Signor en chel dì risorto.
Su la rapresentazion de sto Presepio, nfati, l é stat metù fora na orazion del Vico e soci, che ne regorda i valor e le noste tradiziogn. Via par apede l era pò autri doi scrit del Luciano Girardi (“Le arte de mè nòno”) e del Ugo Neri (“Piéro l’ anarkiko”).
Ma la particolarità no l é pò tant chesta, ma che l é stat enprontà su ‘n vege car da tragoi par el fen, con tant de luce e acua corente, en grum de arte, e portà en giro en cin par tuti i loch de la Val del Biois.
En dì el venia metù dù par apede an albergo, doi dì apede l’entrata de na Coprativa, na meda giornada davant an bar, e cossita par en bon mes. Scuseme se ve ai stufà co tute cheste ciacole che ai contà. Sani a tuti a en’autra bota.
(Val Biois)