Poesie milanesi (1891)/Sonetti/El Casin di Andeghee
 |
Questo testo è completo. | |
| ◄ | Sonetti | Sonetti - In occasion che in la gesa parecchial de Civaa se mett la Scoeula del SS. Sacrament e de la caritaa cristiana | ► |
EL CASIN DI ANDEGHEE.
(inedito).
Prima che mi per sozi te propona
L’è giust che te descriva el nost casin,
Dò stanz mobiliaa a la carlona
Che spuzzen de ves’cios, de nisciorin:
On gabinett capazz d’ona persona,
On bigliard, on camer, on camin,
On vecc d’on camerer ch’el par Simona,
Ona scala orba, ona lobbia, on cortin.
Quatter gatt che no spetten i settant’ann,
Tutt professor d’ombretta e de tarocch,
Che fan sproposit a chi po pu fann,
Che se roseghen, che se dan del gnocch,
E fan on ruzz, on baccan del malann
De dessedà, squas squas, Elia, Enocch.
Ma quell che hoo ditt l’è poch.
Se l’è d’estaa, chi ronfa, chi se me mett
Longh e destés sui scagn a fà on sognett
E lassa corr di pett;
Se l’è d’inverna, gh’è l’assedi al fœugh,
E vegna pur chi vœur, no gh’è pù lœugh.
Gh’è chi parla sul giœugh,
Chi studia sui gazzett, chi rid, a macca,
Chi fasend de savenn no ne sa on’acca,
E tœu el bo per la vacca.
Vun spua, l’olter tossiss, vun l’è manesch,
L’olter rabbiaa, chi è franzes, chi è todesch;
A ritrai tucc sto fresch;
Ma a San Michee se spazza e se fa pratega
De trovà ca da on maester de grammatega.