Poesie milanesi (1891)/Sestinn/Desgrazi de Giovannin Bongee
 |
Questo testo è completo. | |
| ◄ | Sestinn | Sestinn - El viagg de fraa Condutt | ► |
DESGRAZI
DE GIOVANNIN BONGEE
De già, lustrissem, che semm sul descors
De quij prepotentoni de Frances,
Ch’el senta on poo mò adess cossa m’è occors
Jer sira in tra i nœuv e mezza e i des,
Giusta in quell’ora che vegneva via,
6Sloffi e stracc come on asen, de bottia.
Seva in contraa de Santa Margaritta,
E andava inscì bell bell come se fa
Ziffoland de per mi su la mia dritta.
E quand sont lì al canton dove ghe sta
Quell pessee che gh’ha fœura i bej oliv,
12Me senti tutt a un bott a dì: Chi viv?
Vardi innanz, e hoo capii da l’infilera
Di cardon e dal strèppet di sciavatt
Che seva daa in la rondena, e che l’era
La rondena senz’olter di crovatt1;
E mì, vedend la rondena che ven,
18Fermem lì senza mœuvem: vala ben?
Quand m’hin adoss che asquas m’usmen el fiaa,
El primm de tucc, che l’era el tamborin,
Traccheta! st’asen porch del Monferaa
El me sbaratta in faccia el lanternin
E ’l me fa vedè a on bott sô, luna, stell,
24A ris’c de innorbimm lì come on franguell.
Sera tanto dannaa de quell’azion
Che dininguarda s’el fudess staa on olter;
Basta, on scior ch’era in pari a sto birbon
(Ch’el sarà staa ’l sur respettor senz’olter),
Dopo avemm ben lumaa, el me dis: - Chi siete?
30Che mester fate? in dove andee? dicete!
- Chi sont?, respondi franco, in dove voo?
Sont galantomm e voo per el fatt mè;
Intuitù pœù del mestee che foo,
Ghe ven quajcossa de vorell savè?
Foo el cavalier, vivi d’entrada, e mo,
36Ghe giontaravel fors quajcosa del so?
Me par d’avegh parlaa de fiœu polit,
N’eel vera? e pur, fudessel ch’el gh’avess
Ona gran volentaa de taccà lit,
O che in quell dì gh’andass tuss coss in isbiess,
El me fa sercià sù de vott o des,
42E lì el me sonna on bon felipp de pes.
Hoo faa mi dò o tre vœult per rebeccamm
Tant per respondegh anca mi quajcoss,
Ma lu el torna de capp a interrogamm
In nomo de la legge, e ’l solta el foss;
E in nomo de la legge già se sà
48Sansessia, vala ben? bœugna parlà.
E lì bott’e resposta, e via d’incant:
Chi siete? - Giovannin - La parentella? -
Bongè - Che mester fate? - El lavorant
De frust - Presso de chi? - De Isepp Gabella -
In dove? - In di Tegnon - Vee a spass? - Voo al cobbi -
54In ca de voi? - Sur sì - Dove? - Al Carrobbi. -
- Al Carrobbi! - In che porta? - Del piattee -
Al numer? - Vottcentvott - Pian? - Terz. E inscì
Eel satisfaa mò adess? ghe n’hai assee?...
Fussel mò la franchezza mia de mì,
O ch’el gh’avess pu nient de domandamm,
60El va, e ’l me pienta li com’on salamm.
Ah! lustrissem, quest chi l’è anmò un sorbett,
L’è on zuccher fioretton reguard al rest;
El sentirà mò adess el bel casett
Che gh’era pareggiaa depôs a quest:
Propi vera, lustrissem, che i battost
66Hin pront come la tavola di ost.
Dopo sto pocch viorin, gris come on sciatt,
Corri a cà che no vedi nanch la straa;
Foo per dervi el portel, e ’l trœuvi on tratt
Nient olter che avert e sbarrattaa....
Sta a vedè, dighi subet, che anca chì
72Gh’è ona gabola anmò centra de mì.
Magara inscì el fudess staa on terna al lott.
Che almanch sta vœulta ghe lassava el segn!
Voo dent... ciappi la scala... stoo lì on bott,
Doo a ment.... e senti in sui basij de legn,
Dessora in scima arent al spazzacà,
78Come sarav un sciabôl a soltà.
Mi a bon cunt saldo lì: fermem del pè
De la scala... e denanz de ris’cià on pien
Col fidamm a andà su, sbragi: Chi l’è?
Coss’en disel, lustrissem, vala ben?
A cercà rogna inscì per spassas via
84Al dì d’incœu s’è a temp anch quand se sia.
Intant nissun respond, e sto tricch tracch
El cress, anzi el va adree a vegnì debass....
Ghe sonni anmò on: Chi l’è? pu masiacch,
Ma odess, l’è pesg che ne parla coi sass;
Infìn pœù a quante mai sbragi: se po
90Savè chi l’è ona vœulta, sì o no?
Cisto! quanti penser ho paraa via
In quell’atem che seva adree a sbragià!
M’è fina vegnuu in ment, esussmaria!
Ch’el fuss el quondam reficciô de cà
Ch’el compariss lì inscì a fa penitenza
96De quij pocch ch’el s’è tolt su la coscienza,
El fatt l’è ch’el frecass el cress anmò,
E sentì ona pedanna, oltra de quell,
Propi d’ona personna che ven giò;
Mi allora tirem lì attacch al portell,
Che de reson, s’el se le vœur cavà.
102L’ha de passà de chi, l’ha de passà.
Ghe semm nun chi al busilles: finalment
Vedi al ciar de la lampeda de straa
A vegnimm a la centra on accident
D’on cavion frances de quij dannaa.
Che inscì ai curt el me dis: - Ett vô el marì
108De quella famm che sta dessora lì? -
Mì, muso duro tant e quant a lù,
Respondi: Ovì, gè suì moà, perchè? -
Perchè, el repia, voter famm, monsù,
L’è tre giolì, sacre diœu. e me plè. -
O giolì o no, ghe dighi, l’è la famm
114De moà de mì: coss’hal mò de cuntamm? -
Sé che moà gè vœù coccé cont ell. -
Coccé? respondi, che coccé d’Egitt?
Ch’el vaga a fa coccé in San Rafaell:
Là l’è el lœugh de coccé s’el gh’ha el petitt.
Ch’el vaga fœura di cojon de chì!
120No gh’è coccé che tegna: avé capì? -
Cossa dianzen ghe solta, el dis: Coman?
A moà cojon!... E el volza i man per damm.
Ovej, ch’el staga requi cont i man,
Ch’el varda el fatto sò de no toccamm,
Se de no, dia ne libra, son capazz....
126E lù in quell menter mollem on scopazz....
E vœuna, o dò! Sangua de dì de nott!
Che noi se slonga d’olter, che ghe doo!
E lu sonnem de capp on scopellott:
Vedi ch’el tend a spettasciam el coo;
E mi sott cont on anem de leon;
132E lu, tonfeta! on olter scopazzon.
Ah sanguanon! A on colp de quella sort
Me sont sentuu i cavij a drizza in pee,
E se nol fudess staa che i pover mort
M’han juttaa per sua grazia a torna indree,
Se no ciappi on poo d’aria, senza fall
138Sta vœulta foo on sparposet de cavall!
.jpg)