Poesie milanesi/VI - Sonetti/34
 |
Questo testo è incompleto. | |
| ◄ | VI - Sonetti - 33 | VI - Sonetti - 35 | ► |
34.
(Aprile 1814).
Paracar che scappee de Lombardia,
Se ve dan quai moment de vardá indree.
Dee on’oggiada e fee a ment con che legria
Se festeggia sto voster sant-michee.
E sí che tutt el mond sa che vee via
Per lassa el post a di olter forestee.
Che, per quant fussen pien de cortesia,
Voraran anca lor robba e danee;
Ma n’havii fa mo tant, violter baloss,
Col ladrann e coppann gent sora gent,
Col pelann, tribulann, cagann adoss.
Che infín n’havii redutt al pont puttana
De podè nane vess indifferent
Sulla scerna del boja che ne scanna.