Poesie friulane/Timps di guère/Frammento
 |
Questo testo è completo. | |
| ◄ | Timps di guère - Sante Lùzie di guère | Vilòtis di guère | ► |
Frammento.
Oh! no vin vói nè cur par chèste
primevère che slûs in cil
e in tiàre, par chèste tremènde
primevère, che za ’e florìs
su di ogni vermène, che çhante
in ogni çharande, che rîd
ad ógni balcòn, cui soréli...
Un’altre floride ’e florìs
di chèst’ore, la gran floride
dal sang: e l’angòsse nus strènz
il cuèl; e nus pâr che la vite
si disfasi déntri di nó.
Indulà sono chés zornadis
che scorèvin in file, a pianc,
su la néstre ànime, còme
il tic tac di un orlòi antìg
in une çhàmare siarade?
Tic! tac! O ligrìe o passiòn:
zornadis claris o zornadis
scuris: e istès — tic! tac! tic! tac!
la spère zirave, e segnave
il sòlit mal, il sòlit ben;
e la campagne, su la viàrie,
nus clamave; e, al tacà dal frêd
sòt sante Lùzie, nus clamave
la flame, atòr dal fogolàr;
e dal néstri nìd, nus plasève
di vivi e scombati e murì.
Oh çhase néstre abandonade
sènze capì, sènze savé,
sòt il sdrumassi de lavine;
pùare çhase néstre, lassù,
pesçhade, cui sa? di une spòrçhe
genìe, par ògni çhantòn;
çhase néstre disconsagrade
de giònde infame dal nimì!
Dòpo di alòre, oh tròpis vóltis,
viarzìnd i vói al prim sclarì,
vin crodûd anchimò di séi
sul néstri jèt, e che il lusór
da l’albe dovès consolanus
il cur, e sfantà il brut insiùm!
............
Avrìl 1918.