Poesie (Porta)/49 - Quand per i stravaganz de la stagion
Questo testo è completo. |
Carlo Porta - Poesie (XIX secolo)
49 - Quand per i stravaganz de la stagion
◄ | 48 - Carlo Porta poetta Ambrosian | 50 - TRADUZIONE DALL'"INFERNO" DI DANTE - Canto 1 | ► |
Quand per i stravaganz de la stagion
la campagna la va a fass sbolgirà,
ogni fedel zeocò subet el va
a toeussela con chi ghe fa passion.
I picch ghe l’han coj vizzi di patron,5
i scrupolos col tropp amoreggià,
i sonaj col vorè filosofà,
i quamquam con la strada del Sempion,
i magatton col stomegh desquattaa,
i beatt coj bottegh avert in festa,10
i pessee coj vegili trascuraa.
E i pret locch e stremii de la tempesta,
usand misericordia ai nost peccaa,
ghe l’han, savii con chi?... con quell che resta...