Quand on scior pien de danee
l’ha dezis de toeù miee,
l’ha fors nanch sciarnii la donna
ch’hin intorna a fagh coronna
e a sfodragh di compliment5
tucc i amis, tucc i parent,
aderent e dipendent;
e quand riva quell moment
tucc desmostren d’ess content,
fina i ered o i partendent.10
Quij che van davvera in broeuda
hin i nobil della roeuda,
perché san che in sti occasion
solta a voltra el bell e el bon
e se pippa i mej boccon;15
e pensand poeù a l’avegnì
l’è sicur che poden dì:
Là, che adess se disna anch chì.
Ven poeù subet dopo lor
el curat, el cogitor,20
i duu ceregh, el segrista,
la pitocca, l’organista,
el prior, el busseree,
can, borian, boja, scuriee,
tucc golos e tucc ansios25
de ciappà i danee del spos!
E inscì Dia el ghe accordass
el dì adree che el spos crepass
che l’è ben tutt olter sciall
fagh l’offizzi che sposall!30
Dopo ven nodee e scricciatt
per rogà e copià el contratt
e fors anch per lassagh dent
la somenza di client.
Ven poeù in seguet tapezzee,35
stuccador, mattarazzee,
marmorin, invendriee,
murador, pittor, faree,
legnamee, pavionee,
sbianchin, boja, scuriee40
e i letanni di mestee,
tucc e quanc innanz indree.
E l’è in grazia della sposa
che vun ziffola, vun vosa,
quest el canta, quell el rid45
e quell’olter tacca lid.
Chì se raspa, là se frega,
chì se taja e se resega,
chì se picca, là se batt,
chì se netta, là se sbatt.50
Chi va giò e sù per la scara,
chì se derva, chì se sara.
Da ona part se fa ona foppa
e dall’oltra la se stoppa.
Chì se limma, chì se impasta55
là se masna, e pontum basta.
