Poesie (Porta)/155 - Per fav toccà con man sur Carlantoni
 |
Questo testo è completo. | |
Carlo Porta - Poesie (XIX secolo)
155 - Per fav toccà con man sur Carlantoni
| ◄ | 154 - Oh de razza legittema de vacca! | 156 - Quand on scior pien de danee | ► |
Per fav toccà con man sur Carlantoni
che mì porti respett ai proprietaa,
ve mandi indree l’accusa de viltaa
che l’è ona part del voster patrimoni.
Deffatt vardee che mì no me incantoni5
e de tutt quell che scrivi, o ben o maa,
m’en deciari autor con libertaa,
cont anem franch e senza zerimoni.
Rezzevivela donch st’imputazion
e tegnilla de cunt, ché l’è or fonduu10
per vun che se deletta de fà el spion.
Quand poeù mostrarii el muso in del cusà,
sottoscrivendev: Mì... becco fottuu,
oh allora fors la tornaroo a ciappà!