Poesie (Porta)/140 - Prometti e giuri col vangeli in man
 |
Questo testo è completo. | |
Carlo Porta - Poesie (XIX secolo)
140 - Prometti e giuri col vangeli in man
| ◄ | 139 - AL MÈ GROSS IN RISPOSTA AL SÒ SONETT "CAR EL MÈ PORTA N'HOO MÒ PROPPI PIEN" | 141 - Se fuss omm de quell talent | ► |
Prometti e giuri col vangeli in man
de amà prima de tutt chi m’ha creaa,
e subet dopo stò me car Milan
che impesa chì anca quij ch’en parlen maa.
Giuri vess grato a chi me dà el mè pan,5
de no fà mai né lit né sigurtaa,
de lassà raggià i asen, bajà i can,
de tirà semper drizz per la mia straa.
Giuri de scriv di vers fin che me par,
de dì el mè sentiment dove me occor10
con tutta libertaa, redond e ciar,
e se manchi a sti coss, per mè castigh
me contenti perfin del disonor
d’on encommi stampaa sul "Cattabrigh".