Poesie (Porta)/124 - 21 APRIL 1809
 |
Questo testo è completo. | |
Carlo Porta - Poesie (XIX secolo)
124 - 21 APRIL 1809
| ◄ | 123 - Dolor de dent? on cazz che te bozzira! | 125 - PER LE FAUSTISSIME NOZZE DEL SESSAGENARIO SIG.R N. N. COLLA SIGN.RA N. N. GIOVANE D'ANNI | ► |
21 APRIL 1809
Ehi, sura Cecca, che la daga a trà,
gh’hoo de cuntagh di robb de fà stordì,
ma no vuj famm intend de sò marì
perché l’è vun de quij, sì... già se sa!
Basta, adess anca lu el se voltarà,5
perché (ma che la guarda a no zittì)
i noster car todesch prest prest hin chì;
me l’ha ditt el curat un’ora fa.
Ah! sura Cecca, che consolazion
de vedè on’altra voeulta in sti paes10
quij bej soldaa, quij cari barbison.
e i noster giacobitt paghen i spes
e col sò fagottell pien de magon
fan i gambett insemma ai sò franzes.
Ma coss’è sto canon?15
Cossa sbraggen?... Oh Vergina Maria!
Pover Todisch, hin tornaa a dà in la stria,
no soo come la sia,
pur, alla fin, bisogna che convegna
che chi ghe l’ha in del pros che se la tegna.20