Poesie (Porta)/120 - Ah cristo cristo che mortalitaa!
 |
Questo testo è completo. | |
Carlo Porta - Poesie (XIX secolo)
120 - Ah cristo cristo che mortalitaa!
| ◄ | 119 - Ve mandi el mè car pader Garion | 121 - Akmett in tocch comè la porcellanna | ► |
Ah cristo cristo che mortalitaa!
Quanti scioroni ch’è sballaa in sti dì;
pover Milan, se la va innanz inscì,
prest prest te restet senza nobiltaa.
In sti cinqu mes, se no me sont fallaa,5
hin desdott che ha faa mostra de morì,
l’imperatriz, el duca Melz del grì,
el Somaja, el Cusan e l’Arconaa;
la Litta Modignana, el Delfinon,
la Spinola, el Sormann, el cont Caprara10
Bazzetta, Archint, Rosales, Martignon;
la Carcassoeula, se no l’hoo cuntada,
el Lecch, el Carchen e poeù quella cara
cagnetta de don Peder Lattuada.