Apri il menu principale
Ils Sursilvans

../1 ../3 IncludiIntestazione 26 febbraio 2016 50% Da definire

1 3

Ils Sursilvans.

(Nach Annalas, S. 199, 1902.)

Dal culm Crispalt cun furia vegn
La roscha bein armada
Da cloms e grius de guerra ferm
Rebatta la vallada —
5 Ed a Mustèr ils purs vilai
Cun pugns e pals en sepinai.
Ei fan beinvegni als Franzos.
Ils Sursilvans han possa,
Ed en battaglia sco ils uors
10 Han ei sfraccau lur ossa.
E tgi, che po, cun sauna pial,
Untgescha spert la nauscha val.
Curascha catsch' als Sursilvans
Il saun per las aveinas;
15 In pievel liber, buc disaus
De viver en cadeinas,
Cammond' en sia casa sez
E storscha vess il siu cavez.
Il Plaun rampluna susentaus
20 Da fermas canunadas;
Ils … battagliuns della Cadi,
Las rietschas en formadas;
Sper il casti de Rehanau
Han mats e purs giu sepostau.
25 Il Rein tschallata stagn, cotschnius
Da caulda sanganada,
Il saun hostil ha oz lavau
Ruina giud la spada —
Sper il casti de Rehanau,
30 Cheu han las roschas se cargau.
Ils Sursilvans cun halumbards
Spurlentan or las launcas,
Ei sfraccan ils guerriers Franzos
E sdreinan els en brauncas.
35 Sil prau de Domat vegn schuau
Cul saun digl inimitg mazzau.
Vonzei se raspa cun vigur
L' armada spatatschada
E sin ils purs sederscha lu
40 La nauscha cavalcada.
Surforza gronda sfracc' igl um,
Bravura sto spindrar siu num.
Sin vasta tend' il „Crest de morts“
Se saulza sper la selva,
45 En pasch ruaussan spels Franzos
Ils umens de Surselva, —
Che sco liuns han leu battiu
E per la patria se unfriu.