Poesias (Carnot)/7
 |
Questo testo è incompleto. | |
| ◄ | 6 | 8 | ► |
Jeu sun viagiaus.
(Nach Calender, S. 40, 1916.)
Jeu sun viagiaus sur ils camps de battaglia
— Jeu crei che jeu sappi perpeten mai rir —
Neu dallas Carpathas entochen la caglia
Che sto sper la mar sanguinusa pirir:
5 Armadas en flur e vigur ein naven,
Ei tucca da miert, tut il mund ei il zenn.
Jeu sun viagiaus sur las alps e pistiras:
Nu' ein ils signuns, che cantavan pli baul!
Solet in vegliurd sin las trestas planiras,
10 Negina segir pli resun' egl uaul;
La matta stat legra, mo bragia dascus:
„Il bab sut las armas, mes frars ed il spus!“
Jeu sun viagiaus el Tirol tier la stiva,
In mam dat la mumma bargend agl affon:
15 „Tiu bab ei leuora, il bab baul arriva —
Con staunchels sto' l esser! Con liungs ei quest onn!“
Ensi stend' il pop la manutta e ri; …
In griu della mumma: „El tuorna mai
pli!“
Jeu sun viagiaus tier la Roma eterna,
20 Tiel Bab dils fideivels bargend ed urond,
Tier quel che las olmas dil Segner guverna:
„Cammonda la paisch!“ hai rugau el plirond.
El muossa la cruna dil Crucifigau:
„Il retg della paisch han ils pievels sbittau.“
25 Jeu sun viagiaus tier la sala splendusa:
Signurs en valî fan leu freidamein quens,
Dumbrond sin pupi per la mort stermentusa
Entiras armadas e loschs bastiments.
Tgi stat davostier cun quei frunt infernal?
30 Ei quei il demuni u Cain cun siu pal?
Jeu sun viagiaus per turpetg e tristezia
Naven dals combats sin in quolm isolau.
In aunghel stat leu el vestgiu de clarezia,
El stenda la spada sut tschiel videneu,
35 El bragia mirond sin il mund sanguinus:
„Columba de paisch, cu retuornas tier nus?“