Poesias (Camathias)/3
 |
Questo testo è incompleto. | |
| ◄ | 2 | 4 | ► |
Sil Monte Cassino.
Aunc dierma al quolm giudapeis la vallada,
Aunc strusch ina sdrema dell' alva levada,
Mi muossa encunter las steilas la via;
Aunc stat sco en siemi e melanconia
5 Il vegl oliver en mondura sco passa,
La vit gia pallida sin plaunc' e terrassa.
La spunda ei teissa, sulada isada
Cuviera la senda da vegl frequentada.
Aunc pleina rugada ei l' aria recenta,
10 Nocturn serenezi il pèz mi frestgenta.
Il tren della notg lunsch viers Napel camina;
Si dal marcauet la vusch clara, gigina
Dils cots annunziescha dil di la vegnida,
La fin della notg mervegliusa stellida.
15 Sil trutg scursaniu jeu enquerel l' altezia,
In legher mattet va cun mei cun sveltezia,
Raquenta dal quolm e dal vegl sanctuari
E spetga persuenter in bien honorari.
A quolm jeu s' avonzel, pilver, sco a casa,
20 Denton er' l' aurora carschenta serasa;
Montognas avunda er' cheu sepresentan,
Che de survargar ina l' autra sestentan.
Pertratgel vid olmas d' ardida premura,
Che fuian la bassa, muntont cheu si sura
25 Maneivel dil tschiel tier la veta retratga,
Fundond il baghetg de ventira bein fatga.
Mo ussa l' egliada el dretg liug drizzada!
Leusi la fortezia tut illuminada,
En glisch sularonta las tuors e las scalas,
30 Miu puls va pli spèrt, e tgi dat a mi alas?
L' odola marveglia selegra ell' aria
Entuorn quella sontga cittat solitaria.
Finalmein contonschel cun breigia detscharta
La claustra, il tempel cun porta aviarta,
35 Jeu passel sur scalas tier plazz' ulivada,
La patria dil grond Benedetg ei anflada.