Poesias (Camathias)/14
 |
Questo testo è incompleto. | |
| ◄ | 13 | 15 | ► |
Il prau de lieurs.
Jeu sai in liug de bien ruaus,
Dal vitg in toc naven;
Leu denter pegns stat bein postaus
In sempel baun de lenn:
5 Osum 'gl uaul sut ina mutta,
En in englar sper la caplutta.
Tschinclaus da pégns ei leu in prau
Empau dad ina vart
Sco in curtin nundisturbau
10 Da prigulus malart:
Las lieurs serimnan leu segiras,
E senza tema de sventiras.
Da la caplutta ves' ins vi
La lieur, che fa termagls
15 Cun ses lieurets, el prau naschi,
Aunc fleivels, lonzis cagls:
Quels san aunc nuot da la rueida
Dils tgauns de catscha e lur queida.
Cheu eis ei pasch ils dis de stad,
20 Silmeins per in tempset;
El cauld solegl 'gl uaul trai flad
Entuorn il prau quiet:
Stei legras lieurs, vus temeletgas
Nuot metta vus aunc uss en fétgas!
25 Tiel prau de lieurs jeu mon bugent
Naven dal mund sferfatg,
En quei asil aunc innocent
Ha l' olma avantatg:
Anflond puspei la pasch scatschada,
30 En la caplutta isolada.