Poesias (A. Tuor)/22
 |
Questo testo è da formattare. | |
| ◄ | 21 | 23 | ► |
Egl jester.
(Nach Annalas, S. 222, 1898.)
Sundel jus en tiara jastra cun curasch' e legherment,
E vesevel la ventira schon da lunsch a mi riend.
Mo cun larmas sin la vesta mir' jeu ussa sur la mar:
Patria, patria, tei egl jester hai empriu de carezar!
5 Tgei, ventira, tgei carezia, ha tschels ons a mi leu ris,
Nu' ch' jeu hai semiau il siemi de mes leghers giuvens dis!
Oh, co stoiel uss, co stoiel senza tschess uss patertgar
Vid la patria ch' jeu egl jester hai empriu de carezar!
Jeu pertratg vid mes de casa, vid las bassas ed ils aults,
10 Vid ils muvels e las pradas, vid ils lacs ed ils uauls,
Vid las neivs e l' aria fina, vid il Rein, il tschiel schi clar:
Cara patria, tei egl jester hai empriu de carezar!
Ach, jeu vesel aunc l' aurora sin las pezzas, sils glatschès,
Ach, jeu audel aunc las tibas dallas alps e dals misès —
15 Ed in mal, in mal sgarscheivel sa miu pauper pèz cargar
Per la patria, ch' jeu egl jester hai empriu de carezar!
Tgei sa bein igl jester porscher ad in pauper montagnard? …
La ventir' en las montognas stoi anflar er' bauld ne tard.
E sch' jeu, vessel alas, sur la mar schon less sgolar
20 En la patria, ch' jeu egl jester hai empriu de carezar!
Patria, dai a mi, jeu roghel, sch' jeu da tei aunc sundel digns,
In suttetg en las montognas, in suttetg ch' ei aunc schi pigns:
Vesas grossas cauldas larmas dalla vest' a mi roclar?
Cara patria, tei egl jester hai empriu de carezar!