Poesias (A. Tuor)/17
 |
Questo testo è da formattare. | |
| ◄ | 16 | 18 | ► |
Il semnader.
(Nach Annalas, S. 214, 1898.)
Pertgei, mi declara, fa gl' um che leu semna
Cun levzas palidas, tremblontas, ses pass?
Pertgei quella fatscha seriusa, solemna,
Sco sch' el sur misteris trasô patertgass?
5 Ti vesas co 'l semna, ti vesas co' l passa
Suls zuolcs videneu cun penibel quitau;
Ti vesas co 'l aulza, ti vesas co 'l sbassa
Encunter il tschiel e la tiara siu tgau.
Vid neivs e saleps e purgin' e garniala
10 El forsa pertratga cun tem' e sgarschur:
Tenend enta maun la tremblonta capiala
El ditg recammonda siu êr al Signur.
El sez ha luvrau el cun melli fadigias,
Mo gaud' el er' sez la lavur de siu maun?
15 Fors' auters che medan e rimnan las spigias,
Che scudan e vonan e drovan il graun!
Duront la raccolta negin pli ch' empiara
Suenter il pass e las stentas digl um —
El forsa schon dorma, ruaussa sut tiara,
20 Che maglia siu tgierp e stizenta siu num.
Pertgei mi declara, fa gl' um che leu semna
Cun levzas palidas, tremblontas, ses pass?
Pertgei quella fatscha seriusa, solemna,
Sco sch' el sur misteris trasô patertgass?