Ona vision
 |
Questo testo è completo. | |
On certo reverendo fraa Pasqual,
omm de gran pes in che se sia manera
tant a toeull dalla part spiritual
come a toeull dalla part della stadera,
5vun de sti dì de podisnà al camin
pien come on porch el fava on visorin.
L'eva in cà de dò damm bonn religios
che per no desturbagh quella quiett
mormoraven intant a bassa vos,
10e pregaven de coeur Dio benedett
ch'el sterminass con la soa gran bontaa
tucc quij che secca i pret dopo disnaa.
Da on'oltra part don Diegh ex zenturon,
teologh, canonista e missionari,
15on poo el juttava la mormorazion
e on olter poo el sfojava el breviari
per tirass intrattant foeura di pee
quell mattutin cojomber dei dì adree.
Ora mò don Pasqual l'è de notass
20ch'el s'eva quistaa el nomm coj soeu sudor
de sant e de paccion de prima class,
tant che paricc credeven ch'el Signor
giust in l'ora del chilo e del sognett
el le mettess a part di soeu secrett.
25A bon cunt, col conzett ch'el se godeva,
Soa Reverenza l'eva despensaa
da ogni att de creanza, anzi el podeva
ronfà tutta la santa podisnaa
senza pericol mai che i dò lustrissem
30ghe dassen del viilan porch solennissem.
Ma sta voeulta dormend sto don Pasqual
el fava cert versori e certi mocch
inscì foeura dell'orden natural
che i damm s'hin spaventaa minga de pocch,
35per paura che quaj vision tremenda
la ghe fass perd la famm per la marenda.
Basta, quand pias a Dio, finalment
el se desseda torbed come on ors,
e vedend i dò damm tutt in spavent
40e curios de savè cossa gh'è occors,
Che se consolen, Marchesinn, el dis,
che rivi adess adess del paradis.
Caspita che bel coss l'averà vist!
esclamen tutt dò i damm in compagnia.
45Certament, hoo veduu, el dis, Gesù Crist
la soa Mader Santissima Maria,
e de sant e beatt, no cunti baj,
n'hoo vist assee de fann lecc a cavaj.
Dunque l'avrà veduu nostra cucina
50la contessa a cui ci han stampaa la vita,
poi altre dame molte, e qualch pedina
scritt nel Suss e dirett dai Bernabita?
Cara lor, s'hoo da dilla tal e qual,
n'hoo vist nanch vuna, el respond don Pasqual.
55Neanch'una! Come mai! In tanta gloria
ghe sarebber fors mai sfuggii de vista?
Caspita, el nost Devecc bona memoria
l'ha sempre dett ch'el ciel l'è di Sussista;
Dunque, repien, chi è che c'è lassù
60de nostra conoscenza e sua de lu?
Per esempi, el rispond, gh'è Mascaron...
Alfer... Parin... gh'è el sò pessee de cà...
gh'è Metastasi... gh'è l'ost del Falcon.
Metastasi!... i damm sclamen, se pol dà!
65Quel pret che abbiam sentit coi nost orecc
a biasimar tant volt dal bon Devecc?
E d'alter chi hal veduu, ch'el dica on pò!
Hoo vist Bovara, hoo vist Battaja... el dis,
Mosca... Pensa... Vian... Ohibò, ohibò, ohibò!
70Anch de sta sort de robba in Paradis?
No sal che son de quej che l'ha daa in lista
el Devecc per Massoni a noi Sussista?
In Paradis i franchi murator!
Se burlem? Ma sal minga don Pasqual
75che solamente a conversar con lor
se incorre la scomunica papal?
Ma caro lei, car don Pasqual, ch'el taccia,
ch'el par che Dio el ci abbia voltaa faccia.
Intant, per toeù la curta e vegnì al sugh,
80con sto sogn cuntaa sù inscì de salamm
l'ha ris'ciaa don Pasqual de fass dà el rugh
dalla cà e dalla tavola di damm,
se el canonista e teolegh don Diegh
nol ghe trovava subet on repiegh.
85Costuu el gh'ha faa vedè che don Pasqual
per vess staa in del disnà on poo intemperant
l'ha squilibraa col fisegh el moral,
ch'hin i potenz in sogn predominant,
che distinguendum est in casu tali
90quod detur causae phisicae aut morali.
E l'ha conclus infin che l'avè vist
el paradis coj sant e coj beatt
l'è effett moral che ven de Gesù Crist;
ma che eadem ratione el ten per fatt
95che l'avegh vist insemma i fraa masson
l'è effett fisegh che ven d'indigestion.