La polpetta del Re/Quader XV
 |
Questo testo è stato riletto e controllato. | |
| ◄ | Quader XIV |
QUADER XV.
La Forca.
L’era mattina appenna; ona mattina
scura, col ciel quattáa de nivolon,
quando el Boja, vestii in gran pompardina,
l’ha dessedáa el Scianin in la soa preson;
e, appenna l’è stáa dent, — per compliment
el gà ditt: «Scià, ghe sèmm, brutto ladron!»
Lù el piangeva... L’han miss sul carretton,
e subit s’è inviáa la procession.
Ma, quand che l’è rivada
dove la forca l’era preparada,
saccorotto, ha dáa giù ona tal tronada
che tutti han ditt: «Fèmm prest!»
El Can-de-Dia
el Coeugh, el Màgol, la veggia Strìa
ghe tegneven a lèg anch la sentenza;
ma el Boja l’ha sbraggiáa: «Se pò fann senza!»
e, in men che non se disa, al poer Scianin
ghan miss intorna al coll on strafforzin...
— «Ah Mamma! Mamma!» — hin stáa
i sò ultim paroll... E l’è restáa
tacáa su alla cordetta,
cont i oeucc sbarattáa
e cont foeura di dent tant de linguetta!
Ma, proppi in quell moment, s’è scadenáa
el temporal; e giò tronad, tempesta,
e acqua, e vent; e giò sajett a mucc!
Coi fazzolett in testa,
Boja, Giudes, Soldáa, ghe la dan tucc...
Quand, tutt a on tratt, la Scianna, saltand giò
da ona pianta de fò,
la mogna: «Ah, el me fioeu, sont chì a salvatt!»
El Coeugh, el Boja, el Màgol e la Strìa,
e anca lù el Can-de-Dia,
veden subir, difatt,
la portinara, cont la foresetta,
a tajà la cordetta
che ten su el poer Scianin,
e la Scianna a brancall per el coppin
e daghen ona fetta...
Tucc cinqu se metten per corregh adrée...
Ma s’cioppa ona sajetta,
che el par che spara on milion de mortée...
E, de tutt cinqu quij porchi de birbon,
resta domà cinqu muccilt de carbon!
FINE.