 |
Questa pagina è stata trascritta, formattata e riletta. | |
| — 54 — |
QUADER XV.
La Forca.
L’era mattina appenna; ona mattina
scura, col ciel quattáa de nivolon,
quando el Boja, vestii in gran pompardina,
l’ha dessedáa el Scianin in la soa preson;
e, appenna l’è stáa dent, — per compliment
el gà ditt: «Scià, ghe sèmm, brutto ladron!»
Lù el piangeva... L’han miss sul carretton,
e subit s’è inviáa la procession.
Ma, quand che l’è rivada
dove la forca l’era preparada,
saccorotto, ha dáa giù ona tal tronada
che tutti han ditt: «Fèmm prest!»
El Can-de-Dia
el Coeugh, el Màgol, la veggia Strìa
ghe tegneven a lèg anch la sentenza;
ma el Boja l’ha sbraggiáa: «Se pò fann senza!»
