La polpetta del Re/Quader VII
 |
Questo testo è stato riletto e controllato. | |
| ◄ | Quader VI | Quader VIII | ► |
QUADER VII.
El Messagg del Re.
— «Chi l’è?... Chi l’è?» — «Ch’el côra, sur Dottor!...»
— «Ma, a st’ora?... Lù chi l’è?...»
— «Mi sont el gran Camerlecaj d’onor!
El le dimanda el Re-Ciappachelghè!»
El salta el Mago-Màgol giò del lett:
— «El Re?... Lussìa, dov’hin i mè calzett?...
Cossa sarà success?... Damm i calzon!...
La sarà poeu ancamò l’indigestion!»
— «Ehi, sur Dottor, ch’el faga prest, ch’el faga!»
— «Ma, in dove l’è el gilè, brutta lumaga?»
— «Andemm donca!» — «Sont chì!... Ah, marcadetta!
«Desmentegavi asquas la mia bacchetta!»
El Scianin l’ha sentii quell ch’è success,
e ghè vegnuu mò adess
on penser: che la Cà
del Re, essend la Cà de l’Abbondanza,
andandegh, cert lù el podarà trovà
quajcoss de mett in panza...
Sicchè el ven foeura del sò cantinin,
e, pian pianin, — el côr
alla gran Cort del Re-Ciappachelghè
cont el Camerlecaj e col Dottor!