La polpetta del Re/Quader III
 |
Questo testo è stato riletto e controllato. | |
| ◄ | Quader II | Quader IV | ► |
QUADER III.
La Capitolazion di Ratt.
Ma, apenna che el Scianin l’è entráa in fonzion,
i robb han cambiáa ton.
I ratt, in manch de quella, s’hin accort
che gaveven de fà cont on gatt fort;
e, ona nott, gatt e ratt
han decis finalment de vegnì a patt.
El Scianin el gà ditt: — «Car i mè ratt,
contra de mi l’è inutil a scombatt...
A vun, a vun, oppur a mucc, a mucc,
mi, in men d’on mes, ve fóo la peli a tucc!
Mi me rincrèss de quest,... vuj vèss sincer;
ma, insomma, devi fà el mè dover...
E, segond mi, el mèj anmò el sarìa,
che tujessov su tucc e andassov via!»
Sto patt l’è stáa accettáa.
Ma, el Capp di Ratt, dopo de avell firmáa,
l’ha repïáa: — «Car el me sur Scianin,
nun vemm via, giacchè quest l’è el nost destin;
però, se lù el credess de restà chì
a fa el canonich, ch’el me creda a mì,
che el se inganna de bon,
e l’è, con tutt rispett, on gran mincion!
El Màgol e la Strìa hin duu avarasc,
che, per fà danerasc,
se lassarissen squas morì de famm!...
Rosegand de la carta e del legnamm,
nun (suëfáa a tiralla sù per sù,
e fàa divers de lù)
se rïussiva a vivattà ancamò...
Ma lù carta nè legn ne mangia no...
Donca, — in premi del zelo che lù el gà
de desfesciaggh di poer ratt la cà, —
no el trovarà chì dent, in conclusion,
che el mezzo de creppà de borlazion!»
El Capp di Ratt, dopo avè inscì parláa,
intant che tucc piangeven, el gà fáa
al Scianin ona bella riverenza,
e l’ha dáa el gran segnal de la partenza.