La polpetta del Re/Quader II
 |
Questo testo è stato riletto e controllato. | |
| ◄ | Quader primm | Quader III | ► |
QUADER II.
La Cà del Mago Màgol e della Strìa Lussìa.
Là cà del Mago Màgol
e de la Strìa Lussìa
l’è sbirolada e veggia,
foeura de simmetria.
I ratt ghe corren denter
dal tecc alla cantina;
dì e nott ballen, roséghen;
dì e nott ghe fan tonnina.
Del dì rámpen sui tavoi,
de nott rámpen sui lett;...
insomma, paren diàvoi
sti porchi marcadett!
Ghè mai stáa gatt ne trappol
che je podess quiettà;
sicchè la Strìa e el Màgol
ghan on inferno in cà.
El sbraggia ben el Màgol:
«Voglio comando e poss!...»
I loder se ne impippen!
Ghe salten finna addoss!
La Strìa, per faggh paura,
la dòpera la scoa;...
e lor dove la mangia
ghe poccen dent la coa!
Infin, se sto disordin
l’avess de seguità,
la Strìa cont el Màgol
no poden che scappà.